amalinks wokungena

ILO: Ubulembu Bokuzilibazisa Bumemethekisa Ukuthengiswa Kwabantu

  • Mavis Gama

Kulezizalwane zeZimbabwe eziyizigqili kwamanye amazwe.

Abenhlanganiso yezisebenzi emhlabeni jikelele eye International Labour Organisation eZimbabwe bathi ukuswelakala kwemithetho elawula ukusebenza kwamankampani adingela uzulu imisebenzi kanye lendlela zokukhulumisana zakulezi nsuku, ngokunye kokubangela ukuqonga kodubo lokuthengiswa kwabantu ukuyasebenza kwamanye amazwe begqilazwa i-human trafficking.

Ngenxa yokuqansa kwenani labathengiswa ukuyasebenza kwamanye amazwe besuka eZimbabwe, idale lephalamende likubone kufanele lithole ubufakazi obuvelela kunhlanganiso ezibalisa eye ILO, kuzizatho ezenza abantu balingeke ukuyadinga imisebenzi kwamanye amazwe.

Abe ILO bakhuthaze uhulumende ukuba adinge indlela zokulondoloza izizalwane zakhe eziya kwamanye amazwe, lenelise ukuzilonda ngokwaneleyo ukuba zikuphi njalo zenzani kanye lokuloba amagama azo lapho ziphuma elizweni.

Indlela le bathi isisebenzele amanye amazwe abalisa ele Philipines elithola amabillion emali ngomnyaka ithunyelwa ekhaya ivelela kwabaphetsheya kwalelo lizwe.

Esipha umbono wakhe phambi kwe khomithi ebona ngokulondolozwa kwelungelo loluntu phezu kwesimo lesi esinye seziphathamandla se ILO, uMnu. Aldophus Chinomwe, ukhuthaze uhulumende ukuba aqinise umthetho wokunqabela lokhu owe anti-trafficking.

Abe ILO bathi inhlolisiso esithe yenziwa iveza ukuba manengi amathuba wokuthola imisebenzi emazweni emhlubulweni we Gulf States okwenza inengi lithatheke.

Isilinganiso phose amatshumi ayisitshiyagalombili ekhulwini - 80% - sezisebenzi emazweni abalisa ele United Arab Emirites, Qatar le Kuwait, ngabakwamanye amazwe, inengi labo bengabe zwekazi le Africa.

Phose amakhulu amabili ezizalwane zesifazane zeZimbabwe babikwa besetshenziswa njengezigqili eKuwait ngemva kokulingeka lapho bezwe imikhankaso yamathuba emisebenzi kulelo lizwe, kodwa bephetha sebehlukumezwa.

Facebook Forum

XS
SM
MD
LG