IDolobho lakoBulawayo selengeze isikhathi sokuvala amanzi kulandela ukudabuka kwempompi ethwala amanzi isuka edamu leMtshabezi okubangele ukwehla kwesilinganiso samanzi atholiswa idolobho ngama- megalitres alitshumi lasithupha. UNompumelelo Moyo usipha loludaba ngokugcweleyo.
Isikhulumeli sekhansili yakoBulawayo, uNkosikazi Nesisa Mpofu wethule umbiko othi bathethe leli nyathelo kwehla kwesilinganiso samanzi emadamu kulandela ukudubuka kwempompi yeMtshabezi lokungananga kuhle kwezulu ngenxa yeyezi leEl Nino.
Umqondisi wenhlanganiso yamaqgwetha alwela ilungelo loluntu eyeAbbameli Human Rights Lawyers, uMnunzana Tineyi Mukwewa uthi ikhansili yakoBulawayo ngokwenza lokhu yephula ilungelo lokutholisa izakhamizi amanzi lelokukhulumisana lozulu andubana athathe leli nyathelo lokuvalela abantu amanzi.
Okugcizelelwe nguMnunzana Lizwe Jamela umqondisi wenhlelo emhlubulweni wesabelo seNkabazwe leMatabeleland ethi amalungelo oluntu ayephulwe impela kodwa abantu abakhumbule ukuba udubo lwamanzi olubhekane ledolobho aluqalanga lamuhla kodwa seluleminyaka njalo uhulumende ulomlandu wokuphuma lamasu okuqeda loludubo nomanje kulenhlelo okuhlala kukhulunywa ngazo sekubangwa ekhethweni ezibalisa iMatabaeland Zambezi Water Project kodwa kazipheli
Isakhamuzi seMagwegwe West, uNkosikazi Caroline Mudzengi yena uthi ikhansili isinqume okunenginengi ngesikhathi esifitshane mayelana lokuvala amanzi ethi sekubadida ingqondo.
OMunye umhlali weNorthend uNkosikazi Thelma Ncube laye uthi indlela amanzi asehamba ngayo asebatshiya belobunzima.
Ikhansili yethule imibiko njalo yokuba isebenzelana lenkampani kahulumende eyeZINWA ekulungiseni imigodi yamanzi eEpping Forest kunye laseNyamaNdlovu ngemizamo yokwehlisa udubo lokusilela kwamanzi ethi ngoMpalakazi 26 lonyaka imigodi yamanzi iyabe isiphelile ukulungiswa.
Ngeviki amanzi asezahamba kabili, kuyaqala ngamahola amane lasitshiyangalombili kuthi ngelinye ilanga phakathi kweviki azahamba okwamahola angamatshumi amabili lane.
Ikhansili iphume lenhlawulo yekhulu lamadola kulabo abazatholakala bethelela ngempompi, kuthi abazatholakala betshaya izitina ngamanzi empompi bazahlawula inkulungwane kunye labazazinika amanzi kakhansili besakha, kuthi abazazinika amanzi kakhansili ngokuzixhumela impompi yamanzi bazahlawuliswa inkulungane elamakhulu amahlanu amadola.
