amalinks wokungena

Breaking News

'Ubusela Bezinye Izizalwane zeZimbabwe Kwenza Sizondwe eSouth Africa'


Republic of South Africa

Izizalwane zeZimbabwe kwele South Africa zithi zikhathazeke kakhulu ngokwanda kwenani labeZimbabwe abadala amacala kulelozwe ngoba lokho sekusipha isigcono kuye wonke umuntu ovela eZimbabwe.

Kuliviki amapholisa esabelweni seLimpopo athe ngqwa lezigelekeqe zeZimbabwe ebezisebenzisa amadonki amane ukuchaphisa etshebetshebeni lomfula uLimpopo imota yo hlobo lwe Mercedes Benz ebitshontshwe kweleSouth Africa.

Lamasela athe ebona amapholisa acela enyaweni abaleka angena eZimbabwe. Amapholisa athi ngesesithathu lesi sehlakalo.

Lokhu kwenzakala ngesikhathi ugatsha lwezamapholisa lusanda kubika ukuthi kubotshwe isizalwane seZimbabwe eMalaysia, ngodaba lokuyenga intombazana yakweleSouth Africa ukuthi ize eMalaysia kumncintiswano wamaqhathanzipho, kanti ubebizelwa ukuthi azofakwa kubhizimusi lezocansi.

Umgcinisihlalo weZimbabwe Community in South Africa, uMnu. Ngqabutho Mabhena, uthi inhlanganiso yabole emela izizalwane zeZimbabwe ezintweni ezinengi ikhathazeke kakhulu ngenani lamacala adalwa ngabeZimbabwe kweleSouth Africa.

“Eqinisweni ubusela lokuganga kukhona phakathi kwezizalwane zaseZimbabwe ezihlala eSouth Africa. Okuqakathekileyo okumele sikwenze yikubiza umhlangano egoli esingathi thina yicrime summit ukuthi kesikhulume sikhuzane ngendaba le yobugebengu esikhona phakathi kwezizalwane zeZimbabwe eSouth Africa.”

Ngomnyaka ophelileyo kudlwengulwe abesifazana ababili, omkabo baphoselwa edamu bafa, kwagwetshwa abeZimbabqwe ababili lowakweleSouth Africa oyedwa ngalelo cala.

Emalokitshini afana labo Hilbrow, Berea leYeviolle lapho okulezizalwane zeZimbabwe ezinengi, abantu besaba lokukhuluma kubomakhalekhukhwini babo ngenxa yokubhaha kwamasela okwaziwa ngabanengi ukuthi yizizalwane zeZimbabwe.

Akunyanga ngaki umphathintambo wogatsha lwezamapholisa ememezele ezweni lonke ukuthi amacala alolunya, ukubulawa kwabantu lokusetshenziswa kwemibhobho emikhulu adalwa ngabeZimbabwe ababaleka esisotsheni.

Limikhuba yabeZimbabwe abadala amacala kweleSouth Africa isicasule kakhulu inengi lezizalwane zeZimbabwe ezithi sekusenza labo abamsulwa bakhangelwe njengezigangi ezidala amacala.

Isizalwane seZimbabwe, uMnu. Bigfoster Nkomose, uthi inye kuphela indlela yokuqeda lobu bugangi.

“Abantunje abephula umthetho ababotshwe bavalelwe emajele. Lokhu kuba yinto ozikhethela yona wena. Ababotshwe, umthetho kawenze umsebenzi wayo. Ababafakenje ejele bahlukane lento ezinengi. Umthetho kawusebenze. Umuntu nxa ewonile eyeqe umthetho, ephule umthetho akabotshwe.”

Umnumnzana Mabhena uxwayisa abakweleSouth Africa ukuthi akusibo bonke abeZimbabwe abayizigangi.

“Kodwa phela akutsho ukuthi nxa bekhona abagangayo phakathi kwethu sekusitsho ukuthi sonke siyizigebenga. Silabantu izizalwane zaseZimbabwe ezisebenza kuhle ezingagangiyo. Bakhona abanye bethu abaphethe amankampani amakhulu eSouth Africa, abanye bazisebenzela emarestuarant abanye bangamatitsha. Bayasebenza abantu lemali abayiholayo bayabe beyisebenzele.”

UMabhena ukhuthaza abadala ekhaya ukuthi bangabambi ngamandla abantwababo abaseGoli ukuthi bathuthuke njengabantwanana bakomakhelwane ngoba lokho kungabenza bacine sebentshontsha.

Facebook Forum

XS
SM
MD
LG