Inkokheli zenhlanganiso eziphatheke emisebenzini yokusebenzelana lozulu, zingena umhlangano wensuku ezintathu wokuhlaziya indlela ezingasetshenziswa ukuqeda ubuyanga obubikwa sebubhahile emadolobheni ikakhulu ebantwaneni ikanti inengi licabanga ukuba butholakala emaphandleni.
Kubikwa kuzakuthi kufika umnyaka ka 2030 isilinganiso sabantu abangamatshumi amahlanu ekhulwini – 50% bazabe sebengabahlala emadolobheni emazweni abalisa eleZimbabwe, eleMozambique, Namibia, Mauritius kanye leSychelles.
Lumhlangano oqhutshwa ngokusebenzelana kukahulumende lenhlanganiso ezibalisa eye UNICEF le Institute of Environmental Studies – IES, owenzelwa eweteleni ye Harare International Conference Centre – HICC, uza ngemva kwendingisiso eyenziwa phezu kodaba lobuyanga emadolobheni.
Lindingisiso yenziwe kukhangelwa uzulu ohlala emizini emibili ehlala abanengi eHarare eyeHighfields kanye le Epworth.
Obona ngezokuhlelwa kwenhlelo kuUnicef unkosikazi Boiketho Murima utshele lumhlangano ukuba luhluzisiswe loludaba phezu kobuyanga kukhangelwa indawo ngendawo hatshi lokho obekusenziwa ngaphambilini.
Umsekeli kamqondisi we- IES u Dr Jeanette Manjengwa yena utshele lumhlangano ukuba lokhe lukhula udubo lobuyanga emadolobheni. Uveze njalo unkosikazi Manjengwa ukuba isilinganiso sokungamatshumi ayisithupha lantathu ekhulwini – 63% salabo abaphila besemadolobheni kungabayanga ngezizatho ezehlukeneyo okubalisa ukuswelakala kwemisebenzi.
Wathi abaphatheka kakubi yilobu buyanga sikhathi sonke kungabantwana abahlala emadolobheni ukwedlula abasemaphandleni.
Umnumzana Liberty Dube usebenzelana labe Unicef kodwa engosafundela umsebenzi njengoba esaqhuba izifundo zakhe zemfundo yaphezulu. Uchaza ngkugcweleyo injongo yalomhlangano lapho kuze khona inhlanganiso ezehlukeneyo eziphatheke kumisebenzi yokuthuthukisa impiulo kazulu.
Uveza njalo uDube ukuba injongo yalomhlangano yikuphathisana lohulumende ukuze uzulu afundiswe phezu kwendlela angazisebenzisa ukunqoba ubuyanga osebubhahile emadolobheni.
Uphela ngolweSihlanu lumhlangano oqale ngolwesithathu, lapho kukhangelelwe ukuba kwenziwe izinqumo ezizasetshenziswa ukudinga indlela yokwehlisa ubuyanga emadolobheni.