WASHINGTON DC —
UMnu Nelson Chamisa ukhokhela elinye lamacele eMDC-T.
Icele leMDC-T elikhokhelwa nguMnu Nelson Chamisa selicele umthethwandaba weHigh Court ukuthi uvimbe icele elikhokhelwa nguNkosazana Thokozani Khupe ukusebenzisa ibizo lalelibandla lempawu zalo.
Amagqwetha amela icele likaMnu Chamisa afikise amaphepha awo emthethwandaba ngoMvulo.
Izithunywa zomthethwandaba lazo zifikise amaphepha lawa ezandleni zohlangothi lukaMaKhupe ngelanga elifanayo.
Icele elikhokhelwa nguChamisa lithi yilo iMDC-T eqotho. Ngakho, lithi umthethwandaba kumele walise uMaKhupe labanye bakhe ukusebenzisa ibizo leli kanye lophawu lwesandla esivulekileyo.
UMnu Chamisa loNkosazana Khupe badabule ibandla labo phakathi bebanga isikhundla somkhokheli walo esitshiywe nguMnu Morgan Tsvangirai obhubhe ngoNhlolanja.