amalinks wokungena

Breaking News

Umlobi Odumileyo uChenjerai Hove Ubhubhela eNorway


Elinye lamabhuku alotshwa nguChenjerai Hove elilesihloko esithi Bones.

Inengi labalobi beZimbabwe bebelokhe besethula amazwi endunduzo abanye bebuthene emzini womlobi odumileyo umuyi umnumzana Chenjerai Hove obhubhele eNorway ngeSonto.

Omunye wabalobi odumileyo obengumngane omkhulu kamuyi umnumzana Chirikure Chirikure uchaze imfa yakhe njengokulahlekelwa okukhulu hatshi okwemhuli yakhe kuphela kodwa ilizwe lonke njalo okudanisayo yikuthi ufele ekhashana lasekhaya.

Unobhala jikelele wenhlanganiso yabalobi eye Zimbabwe Writers Association ongumbalisi ekolitshini leUniversity of Zimbabwe owake wafundiswa nguye uHove, uthi ingwalo azibhalayo zaphatha inhliziyo zabanengi, zinika ithemba njalo zizaqhubeka zikulezi simo lanxa esesitshiyile.

UHove ufe eseleminyaka engamatshumi amahlanu lathoba munwemunye- 59 njalo ubulewe ngumkhuhlane wezinso ekwele Norway esenza izifundo zeWriters Project Fellow eBrown University, Watson Institute for International Studies. Ubese Norway kusukisela ngomnyaka ka 2001 lapho abaleka khona elizweni esiyaphephela kwamanye amazwe.

UHove waloba ingwalo ezithise kanye lnkondlo wathola imivuzo efana leNorma Award ngomnyaka ka1989 ngogwalo lwakhe “Bones”, owe Germa-Africa Award ngomnyaka ka2001, owe Zimbabwe Writing Award ngo 1987 leminye eminengi nengi.

Utshiye umkakhe Labantwana abayisithupha. Imhuli yakhe iyenza amalungiselelo okuthi aye ngcwatshwa ekhaya lapho adabuka khona.

XS
SM
MD
LG