Ingcitshi zithi amaqembu amela ilizwe leZimbabwe emdlalweni wenguqu angenelisa ukuyaphatheka kumncintiswano yezinga laphezulu nxa kungaba lenhlelo ezicacileyo ezokuqeqetsha abasakhulayo.
Owake waba ngukaputeni weqembu lesizwe uMoses Chunga uthe ekuqaleni komncintiswano wenguqu owokudinga intshantshu zezizwe zomhlaba iWorld Cup osanda kwedlula wathi lesi yisikhathi esiyangisayo kabi kubalandeli bomdlalo wenguqu eZimbabwe.
Intatheli zemidlalo zithe zimbuza umfokaChunga ukuba ukutsho ngaliphi lokhu wathi kungoba izizalwane zeZimbabwe ngalesisikhathi ziyabe sezimatasatasa zikhetha amazwe okusekela njengoba lona elabo ilizwe lingaphumelelanga ukuyadlala kulumncintiswano.
Lesisimo ebesisolwa nguChunga asenzakali ngesikhathi kudlalwa imidlalo yezizwe zomhlaba kuphela njengoba sekuleminyaka ethile iqembu elimela ilizwe elama Warriors lisehluleka ukuyadlala emidlalweni yokudinga intshantshu zezwekazi lase Africa eye Afcon.
Iqembu lama Warriors lenelise ukuyadlala kumncintiswano ye Afcon ebekhona ngo 2004 lango 2006 kuphela njalo ngemva kwalokho abalandeli bomdlalo wenguqu bazithola sebesekela amanye amazwe njengoba elabo liyabe lingekho.
UMkhululi Mthunzi lilunga lenhlanganiso ebona ngokuqhutshwa komdlalo wenguqu iZifa, ko Bulawayo, njalo enguye ophethe uhlangothi lokuthuthukiswa komdlalo wenguqu kulelidolobho.
UMthunzi uthi umdlalo wenguqu uzathuthuka elizweni kungaqalwa uhlelo oluzaqhutshwa kuzo zonke izigaba zelizwe njalo kusetshenzelwana lezikolo.
Eminyakeni edluleyo kuke kwaba lemizamo yokukhetha amaqembu abasakhulayo kodwa loluhlelo luphelele emoyeni ngenxa yokuswelakala kosekelo lwemali.
Ekhuluma ekupheleni kwemidlalo eqoqwa ngowayengukaputeni weqembu lama Warriors uBenjani Mwaruwari, umqeqetshi weqembu lama Warriors uIan Gorowa uthe kuyadingakala ukuba abasakhulayo abatshengisa ukuba balethalenta baqeqetshwe bendawonye kodwa inkinga yimali engekhoyo okwenza leqembu lesizwe lehluleke ukuba lonke okwesikhathi eside nxa lilungiselela imidlalo.
Owayengukaputeni weqembu labaleminyaka engaphansi kwetshumi lanhlanu elimela ilizwe emdlalweni kanobhutshuzwayo uAckim Mpofu, yena osefunda eMelika, uthi eyinye indlela okungabunjwa ngayo iqembu lesizwe eliqinileyo yikuba inhlanganiso yeZifa ibize abadlali abayizizalwane zeZimbabwe abasemakolitshini eMelika kanye lakwamanye amazwe.
Abomdlalo we rugby sebaqala uhlelo lokudinga abadlali abalemvelaphi yase Zimbabwe njengendlela yokuvuselela iqembu elimela ilizwe lona eliphakathi komkhankaso wokuzama ukuyadlala kumidlalo yezizwe zomhlaba ngomnyaka ozayo.
Ilizwe le Zimbabawe lilahlekelwe ngabasakhulayo abalamathalenta eminyakeni edluleyo besiya kwamanye amazwe ngenxa yesimo somnotho esingamanga kuhle.
Lokhu kulokhu kuqhubeka emdlalweni kakhilikithi lapho abadlali abasakhulayo abamhlophe abatshiya bayedlala kwamanye amazwe besola imali encane eholwa ngabadlali beqembu lesizwe.