amalinks wokungena

Breaking News

David Coltart: Kayisoze Ithuthuke Imfundo Nxa Izikolo Zingakathuthukiswa


Owayengumphathintambo wezemfundo kuhulumende womanyano, uMnumzana David Coltart, uthi ilizwe alisoze lenelisa ukutholisa zonke izizalwane imfundo nxa kungela mali yokuthuthukisa izikolo, ukudinga amabhuku kanye lokukhuthaza ababalisi ukuthi basebenze bezinikele.

UMnumzana Coltart ubekhuluma kungxoxo yezemfundo emhlanganweni wenhlanganiso ezizimele zodwa obuqhubeka lamhla koBulawayo

Uthi abantu abanengi bavame ukuziduduza ngokuthi izizalwane zakuleli zifundile bengananzeleli ukuthi nxa inhlanganiso yomanyano wamazwe womhlaba eyeUnited Nations, isitsho njalo iyabe ikhuluma igxile kunani labantu okuthiwa liya esikolo ingakhangeli ukuthi lababantu kuyini abakufundayo.

Wengeze esithi izikolo, ikakhulu ezisendaweni okwahlaliswa kutsha abantu azifanelanga ukusebenza ngoba akulazakhiwo ezeneleyo, amabhuku kumbe ababalisi.

Uthi kuqakathekile ukuthi uhulumende akhiphe imali ezavuselela uhlangothi lwezemfundo ngoba lokhu kungenziwanga inengi liyaqhubeka lingafundi kumbe lithola imfundo engelanhlonzi uzulu egoqe izandla.

Ovela esigabeni seInsiza, uNkosikazi Samkele Dube, uthi ukuswelakala kwenguquko kuhlangothi lwezemfundo kusobala ikakhulu nxa kukhangelwa isigaba lesi seMaNdebeleni lapho okugcwele omakorokoza, ngenxa yabantwana abaswela amathuba okufunda ngezikolo ezikhatshana lokusilela kwababalisi.

Wengeze esithi inengi labantu alenelisi ukuhambisa abantwana esikolo ngenxa yendleko eziphezulu kanye lokuswelakala kwemali kuzulu, okwenza labantwana bathikaze ukuya esikolo ngenxa yobuyanga emakhaya.

EleZimbabwe ngelinye lamazwe abalelwa kulawo alezizalwane ezifundileyo kuzwekazi le Africa. Okwakhathesi laziwa njengelizwe elikhokhelayo lilabantu abangaphezu kwamatshumi ayisitshiyagalolunye ekhulwini, 90.9%, abenelisa ukubhala lokubala, lilandelwa yi Equatorial Guinea, iSouth Africa le Kenya.

Umhlangano wenhlanganiso ezizimele zodwa oqale kuthange uphele ngoLwesithathu.

Umhlangano lo obuthanise inkokheli zenhlanganiso lezi, uhulumende, izifundiswa kanye lozulu uqoqwe ngamakolitshi athi i-Midlands State University, National University of Science and Technology, Lupane State University le University of Zimbabwe, esekelwa yinhlanganiso yasemhlubulweni wangezansi kwezwekazi leAfrica eye Open Society of Southern Africa elamahofisi e Goli kanye le Henrich Boll Stiftung eseKapa eZansi Africa.
XS
SM
MD
LG