amalinks wokungena

Breaking News

Umantshi Uthi Uzanquma Kudaba Lukagumbura Mhlaka 31 Zibandlela


Umantshi Hoseah Mujaya waseHarare uphinde wadlulisela phambili ukuthethwa kwecala lomfundisi wenkonzo yeRGM End Time Message uRobert Martin Gumbura owetheswa umlandu wokudlwengula abesifazana abambalwa.

UGumbura umiswe phambi komthethwandaba kamantshi okwesikhatshana lamhlanje kodwa kugcwele phamu abantu. Amakhosikazi akhe alitshumi lanye lawo abe khona lapho umantshi acine esithi uzakwethula isinqumo sakhe ngolLesihlanu mhlaka 31 Zibandlela 2014.

UGumbura wetheswa icala lokudlwengula abesifazana abambalwa abakhonza ecaweni lakhe abanye babo abendileyo. Omunye wabafakazi abalitshumi lambili abafakaze ekuthethweni kwaleli cala utshele ukuthi uGumbura ube zitshaya isifuba esithi abafazi bonke abakhonza linkonzo ngabakhe.

Omunye njalo umfakazi umnumzana Innocent Nehowa, owayelilunga lenkonzo le kodwa ongasakhonzi khona okwamanje utshele umthethwandaba ukuthi uGumbura ubethi inkonzo yamupha imvumo yokungena emancansini lowesifazane wonke osenkonzweni kungakhathalekile ukuthi utshadile loba hatshi esithi labo abatshadileyo ubaboleka omkabo kodwa ngabakhe vele ngakhoke kumele enze santando lapho efuna.

Igqwtha elilodumo onguye njalo omela iHarare West edale lephalamende unkosazana Jessie Majome uthi uye wayalalela lolu daba luthethwa ngezizatho ezimbalwa ezigoqela ukuthi ngowesifazana ngakhoke akaphathwa kuhle yilolu daba kanye lokuthi umuzi weMarlborough, uphansi kwesigaba asimelayo edale lephalamende.

Uthi ubuhlungu ukuthi kudalwe amanye amacala amanengi esigabeni sakhe okuhlukunyezwa kwabesifazana.

UMajome uthi okwamanaje usemizameni yokuzwisisa amacala alolu hlobo ukuze adingisise ulwazi lamacebo okuthi asebenzise isikhundla sakhe edale lephalamende ukubona ukuthi imithetho ingasetshenziswa ngaiphi indlela ukuvikela abesifazane entweni ezinje.

Uvele elolunye udaba alusungule edale lephalamende uMajome, lokuxoxisana ngendlela engasetshenziswa ukuvimba ukuhlukuluzwa kwabesifazana ngabesilisa.

Udinga ukuthi isigwebo somuntu ofunyanwa ele cala lokudlwengula owesifazana loba umntwana sibe lukhuni kakhulu sibe yiminyaka engamatshumi amathathu.

Uthi uMajome ufuna njalo ukuthi uhulumende kumele abone ukuthi inkamba zonke zamapholisa ziyanikwa izinto zokusebenzisa ukuhlola owesifazana nxa ethe wabuya ukuzomangala ukuthi udlwenguliwe ama rape kits.

Yonale iviki inhlanganiso ezilwela ilungelo labesifazana bajabule okwamagama ngesinqumo esethulwe ngumantshi uSimon Kachambwa sokugweba kanzima isela elikade lihamba ligqekeza ezindlini lidlwengula abesifazana abalitshumi lantathu. UThomas Brighton Chirembwe, ugwetshelwe ukuhlala ejele okweminyaka phose engamakhulu amathathu-290.
XS
SM
MD
LG