amalinks wokungena

Breaking News

Umculi Odumileyo uDarlington Sibanda Uloba Ugwalo


Umculi njalo engumlobi uDarlington Sibanda

Insizwa yeZimbabwe uDarlington Sibanda owaziwa kakhulu kwezokucula usebhale ugwalo aluphawula ngokuthi yisipho esibalulekileyo asipha owayengumsekeli kaMongameli welizwe uNkosikazi Joyce Mujuru.

Lolugwalo olubizwa ngokuthi yiFiction ngolwemzini lulandisa udaba lwendodana eyaphuma isiyadinga imbangela yemfa kayise owafa ngendlela efana xathu lendlela umuyi umnumnzana Solomon Mujuru afa ngayo.

UDarlington uthi lolugwalo uqale ukulubhala ngemva kwemfa kamnumnzana Mujuru eyatshiya abanengi bezibuza ukuthi alukho yini unyawo lwempisi ekufeni kwakhe. Yenake uthi kalukhulumi ngoMujuru kodwa yindatshana elandisa udaba olufana xathu lalokhu okwenzeka kuye.

Ugwalo lwale insizwa ezalwa eHwange lukhuluma ngomfana osakhulayo uMuzi Khaya okwathi ngemva kokufa kukayise ngendlela engacaciyo walonda imikhondo yonke edinga ukuthi kambe kungabe ngubani owabulala uyise.

UMuzi wacina evumbulula ukuthi uyise wabulawa ngombango wesikhundla sikamongameli. Kutheke labo ababulele uyise kaMuzi sebebonile ukuthi sekuseduze ukuthi athole iqiniso, bamthatha baphosa entolongweni. Kulaphoke afika wathola khona iqiniso lokubulawa kukayise lamagama alabo abambulalayo. Wacina esephumile ejele waseqala ukulwisa umbuso woncindezelo owabangela ukufa kukayise waze wawehlula.

Lokhu kunqoba kwamupha ithuba lokuzingela ababulali bakayise lokujeziswa kwabo.

UDarlington uthi usekge wathintana lonkosikazi Mujuru emtshela ukuthi lolugwalo ulupha yena njengesipho esikhulu kuye lemuli yakhe. Uthi yena ukwenza konke lokhu njengomlobi hatshi ngenjongo zokugxamukela kwezombusazwe.

Wengeze ethi lolugwalo lwakhe olulotshwe ngesilungu phansi kwesihloko esithi Conspiracy – Winds of Change luzaqala ukucindezelwa kungekudala ukuze lutholakale kuloba ngubani olufunayo. Uthi kulamacebo njalo okuthi ngeminye iminyaka nxa selwethuliwe lucindezelwe langolimi lweSindebele.

XS
SM
MD
LG