Inhlanganiso yeSADC sisole kakhulu udlakela olukhona elizweni yakhuthaza amabandla akuhulumende womanyano ukuthi agcwalise njalo ahloniphe isivumelwano seGlobal Political Agreement.
Embikweni awethule ekupheleni komhlangano weSadc Troika obuhlaziya udaba lweZimbabwe keleZambia ngoLwesine, umabhalane weSadc uMnu Tomaz Salomao uthe ihlanganiso le ikhathazekile kakhulu ngodlame olukhona.
Abakhokheli bamabandla akuhulumende womanyano abathi uMongamneli Robert Mugabe, uMnu Morgan Tsvangirai, uMnu Arthur Mutambara loMnu Welshman Ncube baphathekile kulumhlangano.
USalomao uthe udlakela kumele luphele njalo amabandla elondoloze ukuthula. Wengeze wathi iSadc ifuna kubunjwe isisekelo sombuso esitsha ngokuphangisa njalo kuqhutshwe ukhetho olukhululekileyo elizweni.
UMnu Salomao uthe iSadc izancedisa iZimbabwe ukuhlela umhlahlandlela wokhetho, wathi njalo inhlanganiso le isikhethe iqula elizasebenzelana leJomic ekulondolozeni ukuhlonitshwa kweGPA.
Inengi lithi lokhu ngokwakuqala ukuba iSadc iphumele egcekeni isola okwenzakala elizweni.
Umgcinisihlalo weSadc Troika, enguMongameli weZambia uMnu Rupiah Banda uxwayise ukuba inkokheli yamazwe angezansi kweAfrica kumele ihloniphe izifiso zikazulu ukuze kwenqatshelwe umvukela ofana lalowo okhona emazweni asenhla yeAfrica kulezinsuku.
Umhlangano weSadc Troika inqume njalo ukuthi iSadc ifuna uMongameli Laurent Gbagbo weleIvory Coast atshiye isikhundla, uMnu Allassane Outtara athathe intambo ngoba kunguye onqobe kukhetho olwedluleyo.
Ukuhlaziya imbiko yeSadc ngeZimbabwe sixhume ingcwethi kwezombusazwe uMnu Brilliant Mhlanga yena othe kuyajabulisa ukuba inhlanganiso le ikhanya sibamba uMugabe ngesandla esilukhuni.
