amalinks wokungena

UGabriella Engels Uphikisa Isinqumo Sokuvikela UGrace Mugabe Emthethwandaba

  • Bennedict Nhlapho

UnKosikazi Grace Mugabe.

UNkosazana Gabriella Engels othi watshaywa nguNkosikazi Grace Mugabe usefake udaba lwakhe emthethwandaba esithi kumele kukhitshwe isivikelo se-diplomatic immunity esaphiwa uNkosikazi Mugabe.

UNkosikazi Mugabe ulakho ukuthoniswa icala leli engangena kwele South Africa.

Lokhu kwenzakala ngesikhathi sekuvele imbiko ethi uNkosikazi Mugabe wadala umonakalo eweteleni ngesikhathi etshaya owesifazanalo labangane bakhe.

Amagqwetha kaNkosazana Engels, othi watshaywa nguNkosikazi Mugabe, athi loludaba solusemthethwandaba njalo luzalalelwa kusukela mhlaka 19 ngenyanga ezayo.

Ngesikhathi uNkosazana Engels emangalele unkosikazi Mugabe, uhulumende wakwele South Africa umuphe isivikelo sokuthi angabotshwa wathi ukwenze lokho ukuze agcine ubudlelwano be South Africa leZimbabwe.

Kodwa-ke emaphepheni afakwe ngamagqwetha ka Nkosazana Engels emthethwandaba, ufuna leso sivikelo sisuswe esithi sasingekho emthethweni ngoba uNkosikazi Mugabe wayengamelanga uhulumende kumbe ukuphelekezela umkakhe ngesikhathi edala leli cala.

Inyathelo likaNkosazana Engels selingconywe kakhulu ngabe Zimbabwe abathi kufanele iZimbabwe itshengiswe ukuthi eSouth Africa umthetho uyahlonitshwa nguye wonke umuntu.

Isizalwane seZimbabwe, uMnu. Khulekani Moyo, uthi ukujeziswa kukankosikazi Mugabe kuzaba yisifundo esikhulu kuhulumende weZimbabwe.

“Wonke umuntu owonileyo umthetho awusebenze kuye. Akaye emthethwandaba abhekane lecala lakhe alenzileyo. UMrs. Mugabe wonile, so ekoneni kwakhe kufanele abotshwe.”

Lokhu kugcizelelwe yisiphathamandla sebandla le Progressive Alliance of Mthwakazi Unions, uMnu. Clement Ncube, othi umkamongameli laye ngumuntu njengaye wonke umuntu.

“Mina ngithi umfazi kaMugabe kufanele abotshwe abhadale. I don’t think i-diplomatic immunity iyamcover, ngoba lowa muntu waye kuprivate visit … eSouth Africa. Akuvunyelwa lokhuyana. So, lalaba abantu beZimbabwe abangathi bayamsupporter umfazi kaMugabe ngibona engani bayayangeka labo esethokala esilwa emawoteleni esilwa labantwana.”

Esinye njalo isizalwane seZimbabwe, uNkosazana Teresia Ngulube, uthi eSouth Africa umthetho awucezi muntu.

“OWinnie Mandela labo babotshiwe ngezikhathi besenza amacala bengabafazi babo Predisent. Babotshwa bangena ejele. UGrace yena nguye onjani? Ngumsebenzi kaMugabe wokuthi bahambe betshaya abantu? Bangabotshwa? La eSouth Africa akumelanga bakuvumele lokho. So mina ngithi ayikhitshwe i-diplomatic immunity. Ngiyamsekela uGabriella. Ngithi akabotshwe uGrace.”

Kusenjalo, sokuvele imibiko eyabhalwa ngabonogada ababesewoteleni ngesikhathi uNkosikazi Mugabe etshaya unkosazana Engels.”

Lombiko uthi kwasala kulegazi endlini le okwakutshayelwa khona uNkosikazi Engels. Kwatholakal njalo elinye igazi engutsheni ezazisembedeni.

Kulolodlakela kwephuka isivalo sekhabothi, kwaqamuka isibambo somnyango kanye lesitulo.

Facebook Forum

XS
SM
MD
LG