amalinks wokungena

Breaking News

IFastjet Isungula Uhambo Lwendizamtshina Lokusuka eHarare Ukuya eJohannesburg


Indizamtshina eye Fastjet

Inkampani yendizamtshina ethwala abantu ngentengo ephansi eye Fastjet yazise ukuba isizaqala ukutwhala abantu kuhambo lusuka eHarare ukuya eJohanessburg kwele South Africa, ngentengo yamadola angamatshumi ayisitshiyagalombili-$80 kuhambo lunye kusukela ngenyanga ezayo, njalo abenkampani le bathi bakhangelele ukuba inengi lalabo abavame ukuhamba ngemota loba amabhasi, bazayisebenzisa.

Esethula uhlelo lwalenkampani, esinye seziphathamandla sayo, esibona ngezokuqhutshwa komsebenzi, umnumzana Ed Lanca, utshele intathelizndaba ukuba bakhangelele ukuqala ngohambo lokuya eJohannesburg kanye ngelanga kodwa nxa abantu bebanengi, bengahamba kabili.

Isiphathamandla esibona ngabatshayela indizamtshina kulenkampani, umnumzana Joe Mparuri, yena uthi inhloso yabo yikuba abasahamba ngamabhasi banelise labo ukusebenzisa indizamtshina. Ethi kungakho intengo yabo iphansi kakhulu kuhambo lokuya eSouth Africa.

Lintengo yabe Fastjet yinhlawulo ephansi kakhulu nxa kuqathaniswa lamanye amankampani alendizamtshina ezithwala abantu ukubasa eSouth Africa okubalisa eye AirZimbabwe, South African le British Airways, inhlawulo yazo eyedlula kancinyane ikhulu lamatshumi amane amadola kuhambo lunye.

Kubiza amatshumi amabili amadola-$20 kuphela, kulabo abasebenzisa indizamtshina ye Fastjet ukuya eVictoria Falls, kube ngamatshumi amahlanu-$50 ukuya e Dar es Laam kwele Tanzania.

Umnumzana Jeffery Ncube waseWestgate e Harare,usijabulelel lesi sehlakalo. UNcube uthi lokhu sekuzakwenza izizalwane zeZimbabwe ebezisehluleka ukuhamba ngendizamtshina, zenelise ukwenze njalo lazo.

Asebeke bayisebenzisa lindizamtshina bathi kuyinto ejabulisayo ukuba sekuzaba lethwala abantu ukuya eJohannesburg njengoba kuyabe sekuthatha isikhathi esincane ukufika khona. Kodwa bakhala ngentengo yokudla kulendizamtshina ye Fastjet, bethi iphezulu kakhulu.

Kuthatha amahola edlula amatshumi amabili ukuya eJohannesburg ngebhasi, kodwa ngendizamtshina kuthatha ihola elilodwa lengxenye kuphela.

Inkampani yeFastjet bathi ibhizimusi liqhuba kuhle kunhambo zayo ze Victoria Falls le Tanzania njalo uhlelo lokuba kube leya koBulawayo, Zambia, Malawi zizokwaziswa kusikhathi esilandelayo.

Ingcwethi zomnotho welizwe, zithi lanxa zingelalo ulwazi olujulileyo phezu kokusebenza kwalenkampani yendizamtshina ye Fastjet lokuthi ithola inzuzo enganani, zithi ilakho ukuphumelela njengoba isanelisa ukuhuga abantu.

XS
SM
MD
LG