amalinks wokungena

Breaking News

I-AU Iza eZimbabwe Ukuzosungula Uhlelo Lokulondolozwa Kwelungelo Labantwana


Iqula lekhomidi ebona ngamalungelo abantwana enhlanganisweni ye African Union selifikile eZimbabwe ukuzabonisana lohulumende phezu kwamalungiselelo wokuphawula okusemthethweni uhlelo lweminyaka emithathu lokuqeda udubo lokwendiswa kwabantwana besesebancinyane.

Emhlangweni lenkokheli enhlanganisweni ezilwela ilungelo labantwana owenzelwe emahofisini e Zimbabwe Women’s Resource Centre and Network – ZWRCN, unobhala okhokhela ukuqhutshwa kwenhlelo, unkosikazi Cisse Mariama Muhamed uveze ukuba eleZimbabwe ngelinye lamazwe alitshumi, abikwa elodubo olukhulu lokwendiswa kwabantwana besesebancinyane.

Unkosikazi Muhammed uthi lokhu kutsho ukuba eleZimbabwe selizakuba ngelesihlanu ukuphawula loluhlelo lweminyaka emithathu lokukhankasela ukuqedwa kodubo lokwendiswa kwabantwana besesebancinyane lanxa kungelinye lamazwe azinikela ukulondoloza abantwana ngaphansi kwe African Charter on the Welfare of the Child.

Kunje uthi lelilizwe ngelinye lamazwe alitshumi awezwekazi le Africa, lapho loludubo olubhahe kakhulu, inani lezehlakalo zokwendiswa kwabantwana besese banciynane liqonge kakhulu.

Osebenzelana uhlangothi lwenhlala kahle kazulu, umnumzana Oliko Kenneth, yena uthi lumkhankso usungulwe ngoNkwenkwezi wanyakenye, ngemva kokunanzelela ukuthi lukhulu loludubo emazweni awezwekazi le Africa.

Umqondisi wenhlanganiso ye REPSSI eZimbabwe, unkosikazi Sibusisiwe Marunda utshele iStudio Seven ukuba ukuza kwaleliqula le AU kuyinto ebajabulisayo, bona njengenhlanganiso eziphatheke emisebenzini efanayo ukuba sekuludaba oselukhangelwa yinkokheli ezikusibanga esiphezulu, kungasafani lakuqala.

Unkosikazi Marunda wengeze ethi kumele uhulumende laye atshengise ukuzinikela kwakhe, enze kube lomthetho obeka umamthatha loba umayendisa umntwana, ajeziswe njengalokho osekuthe kwenziwa nguhulumende weMalawi.

Leli qula liveze ukuba uhlangothi lwe African Union olukhokhela kule mikhankaso, lutholiswe usizo lwemali ivelela kusikhwama se Ford Foundation.

Lithi leliqula lithi lifisa ngaye uyawuphawula okusemthethweni lumkhankaso, umhla ka 27 kunyanga kaMabasa lonyaka ungakedluli, ziqale lezonhlelo zokuwuqhuba, njengoba kuzamele uhulumende ayekwethula iReport yakhe ku-AU ukuba kuyini osekwenziwe okwamanje.

Seluphawulwe emazweni amane abalisa ele Etheopia, Niger, Burkina Faso kanye lele Chad.

Amanye alamazwe okusamele awuphawule lumkhankaso njalo engamanye alawo abikwa elodubo lokwendiswa kwabantwana besesebancinyane, abalisa eleMauritania, Mali, Nigeria, Guinue Bissau lele Uganda.

XS
SM
MD
LG