Uhulumende weZimbabwe usevumele ukuba kulinywe izidakamizwa zohlobo lwembanje ezisetshenziswa ukwelapha emizameni yokuthuthukisa umnotho welizwe.
Lesi yisaziso uhulumende abika ukuba uzasethula kunsukwana ezilandelayo.
Ekhuluma ngemva komhlangano wedale labamphathintambo bakahulumende ele Cabinet umphathintambo wezokwethulwa kwemibiko, uNkosikazi Monica Mutsvangwa, uthi isilimo sembanje lesi sizancedisa ukuthuthukisa umnotho welizwe.
UNkosikazi Mutsvangwa ubike ukuba imbanje lezi zizancedisa ukulungisa amafutha emota wona asilelayo elizweni ethi kuzanceda ilizwe ukuthi lithole imali yakwamanye amazwe langezinye izilimo ezinjengotshinda.
UMutsvangwa ubike ukuba eleZimbabwe lilomthetho weStatutory Instrument 62 ka2018 ovumela ukulinywa kwembanje esethsenziswa kwezempilakahle, ngakhoke esithi ukulinywa kwembanje zohlobo lwe hemp kuzakwenziwa phansi kwalumthetho.
Ocubungula ezombusazwe, uMnu Tjenesani Ntungakwa, uthe uhlelo lukahulumende lolu kuzakuba nzima ukwenza.
Ekhuluma emhlanganweni munye lentathelizindaba umphathintambo wezamandla kagetsi uMnu Fortune Chasi ubike ukuba sebecabanga ukucanda umthetho oweNational Renewable Energy Policy ozanceda ukuba ilizwe lenelise ukuqala umsebenzi wamandla elanga awe solar.
UChasi uthe lumthetho uzanceda ukuba ilizwe lilungise ama solar panels azathengiswa ngentengo ephansi.
Kusenjalo, uhulumende ubike njalo ukuba umkhosi walonyaka wokukhumbula amaqhawe uzakwenziwa phansi kwesihloko esithi ‘Lest we forget’.
Kulonye udaba, abasakhulayo bebandla leMDC bathi uhulumende uzama ukwethusela abalelibandla ukuba bengatshengiseli. Lokhu kuza ngemva kwamazwi ka Nkosikazi Oppah Muchinguri awokuthi leli bandla yilo elenza ukuba kufe abantu ekutshengiseleni okwenzakala ngoZibandlela.
Ngesikhathi esifanayo, umthethwandaba kaMantshi eHarare ngoLwesibili walele abahlanu abalwelwa amalungelo abantu ababotshwa ngenyanga edluleyo besetheswa icala lokuzama ukugenqula uhulumende ukuba bangatholi omakhalekhukhwini babo usithi kumele baqala bamelele uhulumende acubungule udaba lwabo.