Uzulu weZimbabwe usekhala ngokuthi uhulumende kaMongameli Emmerson Mnangagwa useziphatha njengoka Mnu. Robert Mugabe ngokuxotshanisana labaphila ngokuthenga bethengisa impahla kanye labatshayela izimota bedinga imali.
Abantu abanengi bathi akulunganga osokusenziwa nguMnangagwa ofuna ukusebenzisa amasotsha lamapholisa ukuthi athwalise nzima abantu abaphanda imali okusemthethweni.
Bathi kumele uhulumende kaMnangagwa eqale ngokuvula amafekithali engakasusi abantu emigwaqweni njalo lokuthwalisa nzima abatshayela izimota bedinga imali yemuli zabo.
Abathenga bethengisa impahla labatshayela izimota baphiwa amalanga amabili ukuthi baphume emigwaqweni.
UMnu. Thembani Ncube, othengisela eHarare, uthe bekungaba ngcono ngabe uhulumende uqale walungisa indawo abangathengisela kuzo lodubo lokuswelakala komsebenzi njengoba ukutholakala kwabo edolobheni kungenxa yalezi zizatho olukhona elizweni lonke.
UMnu. Samuel Wadzai, isikhulumeli sabenhlanganiso yabaphila ngokuthengisa eyeVendors Initiative for Socio-Economic Transformation, uthe okwenziwa nguhulumende ukuthumela amasotsha kundaba ezinje yikwephula imithetho.
Uphinde wakhuthaza abogatsha lwembuso yezabelo ukuthi bazame ukukhuluma labantu bengakabangeli ingxabangxoza.
UMnu. Blessing Moyo, othengisela eCopa Cabana, laye ugcizelele elokuthi uhulumende kumele abanike imsebenzi kulokubaxotsha kuphela ebatshiya besiyadubeka engabancedisi ukuthi badinge ezinye indlela zokuziphilisa.
Ingcitshi ecubungula ezombusazwe, uMnu. Pride Mkono, uthe lokhu kuhle kutshengise sobala ukuthi uhulumende kaMnangagwa akanaki uzulu njalo usekhangele impilo yakhe labaseduze kwakhe ahambe lebo eDavos, kweleSwitzerland.
Imizamo yokukhulumisana lesikhulumeli sekhansili yeHarare, uMnu Michale Chideme ayifezekanga njengoba ucingo lwakhe belungangeni.
Ikhansili yeHarare layo ihlele uhlelo oluhambelana lolukahulumende lokusebenza kwayo okwensuku ezedlula inyanga ezintathu olwe100 Day Plan oluhlose ukukhipha abathengisela edolobheni okungekho emthethweni labezimota ezithwala abantu zingelamvumo.
Ngeviki eliphelileyo kuke kwaba lengxabanxoza ethile ezitaladeni phakathi kwamapholisa labathengisela eHarare okungekho emthethweni kodwa akula olimeleyo.
