amalinks wokungena

Breaking News

'Uhulumende Kasoze Ayithole iUS$3.5 billion Yokuhlawula Abalimi Abamhlophe'


Ben Gilpin, the director of Zimbabwe Commercial Farmers Union, says about 1,000 members have submitted papers seeking compensation from the government, in Harare April 16, 2019.

Abacubungula ezombusazwe lezenotho bathi kuzakubanzima ukuthi uhulumende athole iUS$3.5 billion ayidingayo ukuze ahlawule abalimi abamhlophe abathathelwa amapulazi phansi kohlelo lokwaba kutsha umhlabathi.

Ekhuluma emhlanganweni weUnited Nations ngeviki edluleyo uMongameli Emmerson Mnangagwa ucele amazwe omhlaba ukuthi aphathise eleZimbabwe ukuze libhadale abalimi laba.

Uhulumende labalimi laba basayinelane isivumelwano lesi ngoNtulikazi bavumelana ukuthi bazasebenza ndawonye ekudingeni iUS$3.5 billion yokuhlawumela inthuthuko abayenza emapulazini abaxotshwa kuwo kuhlaliswa abansundu.

Kodwa ingcwethi kwezenotho lakwezombusazwe zithi aziboni itholakala limali ngoba eleZimbabwe selilembali engcolileyo ngenxa yokungabhadali izikwelede zalo, imisebenzi yenkohlakalo kanye lokungahloniphi amalungelo oluntu.

“Kuyinto engekho lula ukuyithola imali engako ikakhulu elizweni elinjengelethu elikhangelwa ngamanye amazwe njengesizwe esingezwayo, isizwe esingalandeli imithetho,” kutsho ingcwethi kwezenotho uMnu Reggie Shoko.

Ngesikhathi uhulumende esazisa uzulu ngesinqumo sakhe sokuhlawula abalimi abamhlophe, abantu abanengi baveza ukuthukuthela besithi uhulumende kamelanga abhadale imali le.

Uhulumende wasuka wachasisa ukuthi imali le ayisoze ivele esikhwameni sakhe kodwa uzayidinga kwamanye amazwe.

Khepha uShoko uthi lanxa ingaze ivele kwamanye limali, ilakho ukuba yisikwelede esizacina sibhadalwa nguzulu weZimbabwe.

“Nxa amanye amazwe ezasincedisa, kuyabe kuyisikwelede esimele sisibhadale… kuyacina kusiba yisikwelede esizakhweza izikwelede zethu kwamanye amazwe.”

Ocubungula ezombusazwe uMnu Dumisani Nkomo yena uthi imisebenzi yenkohlakalo yiyo ezakwenza amanye amazwe engalokithi aphe uhulumende imali.

“Kulemali le eyangenayo eyokuthenga izinto zeCovid eyantshontshwayo, ngakho khonokho kungabangela ukuthi amanye amazwe angamthembi uhulumende wethu,” kutsho uMnu Nkomo.

Amazwi akhe agcizelelwe ngolwela amalungelo oluntu uMnu Mlungisi Dube.

“Uhulumende okhona ulabantu abagcwele ubusela, ngakho ama-international financial institutions kasoze athande ukuthi aphathise ngoba nxa bengayikhipha limali bayakwazi ukuthi bayabe beyithele emgodini abasoze baphinde bayithole,” kutsho uMnu Dube.

UMnangagwa labebandla lakhe leZanu PF bathi ukubotshwa kweziphathamandla zikahulumende ezifaba loMnu Obadiah Moyo loMnu Jason Machaya yena osanda kuqale ukudonsa iminyaka emine entolongweni kuveza sobala ukuthi bazimisele ukulwisana lenkohlakalo.

Asenelisanga ukukhuluma leziphathamandla zikahulumende lomkhokheli wenhlanganiso emela abalimi abamhlophe, iCommercial Farmers Union, uMnu Ben Gilpin.

Imizamo yokuhlawula abalimi abamhlophe le iza ngesikhathi umnotho welizwe uqhubeka utshabalala njalo lababalisi labo bephakathi kokukhalala umsebenzi befuna ukwengezelelwa iholo.

please wait

No media source currently available

0:00 0:05:08 0:00

Facebook Forum

XS
SM
MD
LG