amalinks wokungena

Breaking News

Uhulumende Wethula Imali Yokuqedisa Ukwakhiwa Komngcele WeMaitengwe


Abantu abahlala eziqintini eziduzane lomngcele weMaitengwe ngasentshonalanga kwePlumtree bathi bajabule kakhulu ngenyathelo likahulumende lokukhipha imali yokuqedisa ukwakhiwa kwalumgcele.

Uhulumende uphe ugatsha lweImmigration imali engangenkulungwane ezingamakhulu amane $400, 000 njalo uthi ukwakhiwa kwalumngcele kuzabe sokufeziwe ekupheleni komnyaka ozayo.

Umgcele weMaitengwe usungulwe kuminyaka esanda kwedlula, njalo inengi labantu abahlala eziqintini ezifana leBambadzi, Mangubo, Madlambudzi, Malalume lezinye indawo zePlumtree abasebenza emazweni agoqela eleSouth Africa leBotswana sebengena ngawo nxa besiza ekhaya.

Kodwa kusakunengi okumele kwenziwe ikakhulu kucele leZimbabwe, okugoqela ukulungiswa komgwaqo, amabholoho lokwakhiwa kwamahofisi.

Lumngcele ulakho ukusetshenziswa ngabanengi abangena elizweni ngezimota, ikakhulu ezinkulu ezithwala impahla bevela emazweni afana leleZambia, Namibia, South Africa leBotswana nxa ungalungiswa kakhuhle.

UMnu Difa Dube, ovame ukusebenzisa umngcele lo uthi ujabule kakhulu ngenyathelo likahulumende njalo uthi ukhangelele ukuthi wakhiwe lumngcele uphele ngokuphangisa.

Okuhambelana lalokhu

XS
SM
MD
LG