Uhulumende kuliviki ukhangelelwe ukusungula umkhankaso wokukhuthaza uzulu ukuthi ayekele ukubhema igwayi ngoba libangela imikhuhlane ebulalayo efana lemvukuzane yamaphaphu.
Ugatsha lwezempilakahle yilo olukhangelelwe ukuqala loluhlelo ngoLwesihlanu esibhedlela seBinga.
Umphathintambo walolugatsha uMnu Henry Madzorera iStudio 7 ukuthi bajonge njalo ukukhumbuza ababhemayo ukuthi kulicala ukubhemela emphakathini kumbe endaweni ezisetshenziswa ngabanengi ezifana lamabhasi.
Emhlabeni jikelele kulabantu abayizigidi eziyisithupha (6 million) ababulawa yimikhuhlane ebangelwa yikubhema igwayi ngomnyaka.
Abanye ngababamba limikhuhlane kungayisikho ukuthi bayabhema kodwa ngenxa yokuthi bayabe behotshe intuthu yegwayi nxa bethe babaduzane lomuntu obhemayo okwesikhathi eside.
Ngalokho, uMnu Madzorera uthi uhlelo lolu lujonge ukukhuthaza ababhemayo ukuthi bekele ukuze bevikeleke emikhuhlaneni, kanti njalo bavikele labo abangabhemiyo.
Kuvumelekile emthethweni weZimbabwe kuthi ungabona umuntu ebhemela endaweni engavunyelwayo, efana lebhasi, ikombi kumbe endlini zokudlela, amakhefa, umbophise.
Ukuze umkhankaso lo uphumelele, uhulumende ukhangelelwe ukuthi afake amabhakane endaweni ezitshiyeneyo, ekhulumisane lozulu njalo amemezele emawayilensini lema-television, kutsho isakhamuzi sakoBulawayo uMnu Mandlenkosi Gatsheni.
Kolunye udaba oluphathelane lezempilakahle, uzulu wase Mhondoro Ngezi ubikwa esesungule uhlelo lwesikolo sokuphathisa intandane labaswelayo abasemangweni lo. Isikolo lesi kasibadalisi mali njalo asila ndaba lokuthi abantwana bagqoke amauniform loba hatshi.
Uzulu walu mango ukhuthaza uhulumende ukuthi asungule izikolo ezinye kumbe aphathise kulezo eziyabe zisungulwe nguzulu. Kubika intathelizindaba yeStudio 7 uMavis Gama eseHarare.
