amalinks wokungena

Breaking News

UMnangagwa Uveza Abacatshangelwa Ukuthi Bafihla Imali Abayithola eZimbabwe Kwamanye


UMongameli Emmerson Mnangagwa ngoMvulo uveze amabizo abantu lamankampani okuthiwa athi enza imali enengi kwele Zimbabwe ayifaka emkambo wemali kwamanye amazwe okungekho emthethweni.

Kodwa okumangalise abantu yikungabikhona kwamabizo alabo abaziwayo ukuthi baphatheka kulokhu.

Abantu laba abedlula inkulungwane babikwa bafihla imali ngendlela engekho emthethweni langenkohlakalo efika phose ibhiliyoni lamadollar - $865 million.

Ingwalo ezivezwe yihofisi kamongameli welizwe leZimbabwe ngoMvulo ezifakwe kumaqembu amathathu bezilabantu lamankampani alabo abangaphendukisanga imali ngemva kokuthengisa izinto phandle kwelizwe, abatshontsha ngokubhadalela impahla ngaphandle kwelizwe kungela lutho olubuyayo labafaka imali emabhanga angaphandle kwelizwe okungekho emthethweni.

Ingcitshi ecubungula ezombusazwe, uMnu. Pride Mkono, uthi uMnangagwa uzama ukulungisa udaba lwenkohlakalo olwehlula owayengumongameli, uMnu. Robert Mugabe, ngoba sokungumnyaka wokhetho.

Kuluhlu lwabantu abafihla imali emabhanga phandle kwelizwe kugcwele abadabuka kwele China. Imali etshontshwe ngenkohlakalo kubanga leli ifika phose ingxenye yebhiliyoni -$464,204,171.

Osakhulayo, uSilethemba Siziba, uthi uluhlu olukhitshiweyo alutsho ukuthi imali le izaphendukiswa kwele Zimbabwe njalo abanye abatshontshayo abakubandla leZANU PF kabasoze bakhonjwa langomunwe.

Eyinye ingcwethi ecubungula ezombusazwe, uMnu. Mlungisi Ncube, uthi kungaba kuhle ukuthi uhulumende esebenze nzima ukuthi imali le iphendukiswe yonke izonakekela abantu beZimbabwe kodwa waphinda wasola ngokuswelakala kwamalunga eZANU PF kuluhlu lwamagama abamele bathathelwe amanyathelo.

Osakhulayo uDiscent Bajila laye uthi ukuswelakala kwamanye amabizo, ikakhulu labo abakubandla elibusayo.

Unobhala jikelele wenhalanganiso yabafundi eye Zimbabwe National Students Union, uMnu. Ashleigh Pfunye, uthi uluhlu lolu olukhitshwe nguMnangagwa ngolokuvala abantu amehlo njalo bona abakholwa ukuthi yiwo wodwa amasela atshontsha imali njengoba uMnangagwa engabhalanga abangani bakhe.

Usomabhizimusi obesedale lephalamende ngamaviki aphelileyo, uMnu Wicknell Chivhayo, laye ule nkampani eqanjiweyo le eyamusa edale, iIntratek.

Inkampani eye African Associated Mines ibikwa yaphumisa izigidi ezedlula amatshumi ayisithupha zamadollar - $62 million, besekusithi iMarange Diamonds yakhipha izigidi ezedlula amatshumi amahlanu - $54,2 million.

Abemba iDiamond abahlanganisela iJinan, Marange Diamonds baqanjiwe kanye lesikolo sokubamba lokugezisa ilitshe eliligugu ele diamond ese Zimbabwe Diamond Education College.

ISchweppes, Lobels, Associated Newspapers abangabanikazi beDailyNews, Ekusileni Medical Centre, Hwange Colliery Company lamanye amanengi avezwe ukuthi ebephila ngenkohlakalo.

Abezinkonzo ezihlanganisela iHarare City Central Adventist Church, iFamily of God leZAOGA labo bakhona kuluhlu lwabaphatheka ekuphumiseni izimali phandle kwelizwe.

Abantu lamakhampani avezwe namhla abekulolu luhlu ngaphose afike inkulungwane ezimbili - 1,844.

Facebook Forum

XS
SM
MD
LG