amalinks wokungena

Breaking News

Uhulumende Uthi Kusiyaphela Umnyaka Ilizwe Lizabe Selilesisekelo Sombuso Esitsha


Uhlelo lobuthapha imibono kazulu luke lwamiswa olwesikhatshana esigabeni seManicaland eChipinge ngoba labo abathapha imibono kazulu sebeswele amafutha ezimota okuyakwenza umsebenzi.

Udubo lolu lubangelwe yikusilela kwalamafutha ehlangothini olubona ngezimotha zikahulumende olwe CMED eMutare. Abathapha imibono kazulu laba labakhokheli babo behlulekile ukuyagqiba umsebenzi wabo esigabeni seChipinge East.

Esigabeni seMasvingo lakho kubikwa kube lohlupho ngoba abathapha imibono kazulu sebeqede iviki yonke benganikwanga imali yokudla, labamahotela abahlala kiwo bebancitsha ukudla besithi abakabhadalwa yiCOPAC.

Kodwa iCOPAC ithi abathapha imibono kazulu bazaphiwa imali zabo iviki yonale ingakapheli. Ngakwelinye icele labo abebethapha imibono kazulu esigabeni seMatopo bathi bahambe kuhle kakhulu njalo abantu abanengi bangene imihlangano yabo ngolweSine.

Umsekeli womunye wabagcinisihlalo beCOPAC uNkosikazi Gladys Gombami Dube utshele iStudio 7 ukuthi abantu bebesipha imibono yabo bekhululekile kungela kwethuselwa. Uthe abanengi bafisa ukuthi izigaba zelizwe zizibuse, iDevolution of Power.

Laloba kulendubeko ezimbalwa ezihanqe loluhlelo uhulumende we Zimbabwe uthi uhlelo lokulotshwa kwesisekelo sombuso luhamba kakuhle okokuthi sokulethemba lokuba ilizwe lizaphuma logwalo lwesisekelo sombuso ekupheleni kwalumnyaka.

Abathapha imibono kazulu esigabeni seMatebeleland South ngolweSihlanu bazaqhubeka besesigabeni seMatopo. bazakwethekelela indawo ezithi Mbuya primary school ward 21, Store farm ward 21, Nyampundu center ward 21, Betseba primary school ward 21, Devondale farm ward 22, Anthony farm ward 22 lase Maphisa business center kuward 22.

XS
SM
MD
LG