amalinks wokungena

Breaking News

'Uhulumende Wakwele South Africa Kachasisele Uzulu Okumunyethwe yiOperation Fiela'


Bahlolisisa uhlelo lweOperation Fiela olwesatshwa ngabantu bokuza.

Inhlanganiso ezimela abakwamanye amazwe kwele South Africa zithi zifuna uhulumende achacise obala ukuthi uhlelo olusungulwe ngamaviyo ezomvikela olokuzingela izigebenga OlweOperation Fiela kalusoke luqhubeke lubhekiswe kuzizalwane zakwamanye amazwe.

Abakwamanye amazwe laba baqhube umhlangano eJohannesburg bahlela ukuthi bafuna ukuyabonana lomsekeli kamongameli welizwe ngaloludaba.

Abaphatheka kuhlelo lwe Operation Fiela ...
Abaphatheka kuhlelo lwe Operation Fiela ...

Abakwamanye amazwe abangene lumhlangano eJohannesburg bathi bafuna uhulumende abachazele ngokusobala ukuthi kungani uhlelo lweOperation Fiela, lungasazingeli izigebenga kodwa ludinga abakwamanye amazwe abangelamvumo yokuba selizweni.

Umgcinisihlalo wenhlanganiso emele abakwamanye amazwe kwele South Africa eyeAfrican Diaspora Forum, uMnu. Marc Gbaffou, uthi okubakhathazayo yikuthi selokhu loluhlelo lwaqalayo, lugxile endaweni ezilabanengi abavela kwamanye amazwe kanti kubotshwa kakhulu abangelamvumo kweleSouth Africa.

“Siphakathi kwemizamo yokubonana lomphathintambo wogatsha lwezamapholisa, umsekeli kamongameli welizwe kanye lomphathintambo wogatsha lwendaba zasekhaya ngoba lolu luhlelo lwezwe lonke. Akufanelanga basebenzise loluhlelo ukucwasa abanye abantu.”

Ngenyanga ephelileyo uhulumende wethule i operation fiela yesibili, ehlanganisa amaviyo wonke ezomvikela ekulwiseni ubugebenga. Kodwake inengi labakwamanye amazwe bakhala ngokuthi abezomvikela laba nxa befika ezitezi abahlala kuzo bawisa izivalo, baba vuse phakathi kwamabili bese kubotshwa labo abangelancwadi zokuba selizweni ngokusemthethweni.

Umgcinisihlalo weZimbabwe Community in South Africa umnumnzana Ngqabutho Mabhena, uthi lobanje besekela ngokugcweleyo loluhlelo, abathokozi ngokuthi injongo zalo zikhanya zingalunganga.

Ikhokheli yeOperation Fiela ...
Ikhokheli yeOperation Fiela ...

“Sizama ukuthi sizwisise indaba leyi yokubotshwa kwabantu okuthiwa yi Operation Fiela. Ngoba thinake siyasekela i operation fiela kodwa esingakusekeliyo yikuthi besekubotshwa abantu abangelazincwadi zokuhlala la. Ngoba ngokusekela kwethu lathi singamavictims awecrime.”

Kulo umhlangano abakwamanye amazwe laba abebesemhlanganwenilo obizwe yi African Diaspora Forum, bebebize loMeya wedolobho leJohannesburg njengoba kunguye obedumile ngodaba lokuthi abakwamanye amazwe abangelamvumo yokuba kwele South Africa ababuyele kubo.

Kodwa ihofisi kameya ikulandule lokho isithi kayisiyo ngxenye yaloluhlelo.

Inhlanganiso zabakwamanye amazwe zithi akufuzanga kuzingelwe lokubotshwa wonke umuntu ongelamvumo yokuba selizweni ngokungekho emthethweni. Bathi abanye balaba bantu kungenxa yephutha logatsha lwendaba sasekhaya olwehluleka ukubapha lezi incwadi. Ngakolunye uhlangothi kulabathi abanye ababotshwayo yiziphepheli ezibaleke emazweni azo ngezombusazwe okokuthi bangaphindiselwa emuva kufaka impilo zabo engozini.

Lwethusa Abantu Abanengi Uhlelo Lwe Operation Fiela
please wait

No media source currently available

0:00 0:02:38 0:00

Facebook Forum

XS
SM
MD
LG