amalinks wokungena

Breaking News

Uhulumende weZimbabwe: Tshiyanani Lomkhuba Wokuhambahamba Mahlayana


Umpathintambo wezokwethulwa kwemibiko uNkosikazi Monica Mutsvangwa

Uhulumende uthi lanxa esenza konke okusemandleni akhe ukuba atholakale amabhasi athwala uzulu aweZUPCO, ukhathazekile ngokwanda kwabantu abahamba mahlayana, okwenza ikhule ingozi yokuthelelana iCOVID-19 emadolobheni.

Lokhu kuvezwe ngumphathintambo wezokwethulwa kwemibiko, uNkosikazi Monica Mutsvangwa emhlanganweni lentathelizindaba phezu kwesimo elizweni lokwenziwa ngabequla elibona ngenhlelo zokuvikela ukuthelelanwa lula kweCOVID-19 elizweni, ele AD-HOC Inter Ministerial Taskforce on COVID19.

Ngakhoke uNkosikazi Mutsvangwa ukhuthaza abantu ukuthi bahambe lapho kulesidingo hatshi mahlayana ikakhulu ngezikhathi zokuya lokuphenduka emsebenzini.

Kodwa uzulu labalwela ilungelo loluntu bathi kuyabamangalisa okukhulunywa nguhulumende elizweni elilesilinganiso esikhulu sabaphila ngokuthengisa njalo okunengi abakudingayo okubalisa amabhanga, kutholakala edolobheni.

Umnumzana Victor Dube uthi kunzima ukwehlukanisa abantu abahamba ngoba kule sizatho lababikwa nguhulumende ukuthi bahamba mahlayana.

“Angikuzwisisi mina lokhu njalo kimi, ngingathi kuyangihlupha ukuthi kanti sibuswa ngabantu yini kumbeni sibuswa sibuswa yini?. Nxa esithi umuntu uhamba oku unnecessary, uyabe esitshoni?. Ngoba engikubonayo, umuntu uvela endlini, itransport iyahlupha njalo iyadula, shuwa engatshona ebhoda ngedolobha lonke. Khathesi kulendlala akulamali imuli ezinengi zaziphila ngakhonokho ukuthengisa abo esitaladeni langaphi, langaphi, akula lutho, bazakudlani abantu bonalaba?. Nxa umuntu ephuma endlini esiya endaweni aya kuyo, ulesizatho sokuya khonangale.”

Uhulumende akukhulumayo lokhu uDube ethi akusebenzi elizweni elinjengeZimbabwe lapho abantu vele bengahambi nje ngoba bekholisa ukuhamba.

“Khathesi sikhangela indaba zempilakahle, akulazibhedlela, akulani. Abanye bahambela ukugula ngokwakho, ukuthi ayebona phela osiyazi ukuthi bemncede. Nxa umuntu esesithi bahamba oku unnecessary, ukhanya engumuntu ophila komunye umhlaba esingawaziyo thina. Kutshengisela ukuthi sibuswa ngabantu abangananzi impilo yomuntu, abangafuni ukuyizwisisa ukuthi itshoni. Nga bayakhangela ukuthi kanti vele abantu bahambelani, bebezakhuluma into engcono. Yikho ke angikuboni kungabantu abangathi bayasinceda nxa bekhuluma inkulumo enjalo. ”

Kwasekelwa ngenye ingcwethi kwezomnotho elwela ilungelo loluntu, umnumzana Masimba Manyanya othi uhulumende makalungise isimo somnotho.

“Ngani, ngoba silobukhokheli engaziyo ukuthi ilandele kuphi okuqakathekileyo njalo kuyibukhokheli obungacabangiyo kundaba eziqakathekileyo okumele kube yizo ezithuthukisa ilizwe.”

Embikweni kahulumende, owethulwe nguNkosikazi Mutsvangwa, uthi wenza linkuthazo ngoba efuna ukulondoloza impilo yabantu njalo ebazi ubunzima ilizwe elibhekane labo kakhulukazi ngalesi sikhathi seziqondiso zeLockdown ezikhuthaza ukuhlala emakhaya, ukugqoka ama mask sikhathi sonke umuntu esemphakathini lokunye. Uqhubeke ethi iziqondiso ezihlelwe eZimbabwe zenziwe kulandelwa ezabekwa ngabenhlanganiso ebona ngezempilakahle emhlabeni jikelele eye World Health Organisation – WHO.

Udaba lokukhonona kukahulumende ngabantu abahambahamba mahlayana siluphiwa nguMavis Gama
please wait

No media source currently available

0:00 0:03:38 0:00

Facebook Forum

XS
SM
MD
LG