amalinks wokungena

Breaking News

Uhulumende weZimbabwe Uthi Ukhathazekile Ngokutshengisela kweMDC


UNkosikazi Monica Mutsvangwa

Idale labaphathintambo bakahulumende weZimbabwe, eleCabinet, libikwa liphume lesinqumo emhlanganweni walo namhlanje sokuthi abantu baxwayiswe ukuthi bengasetshenziswa ngabafuna ukudala ingxabanxoza elizweni.

Ekhuluma ngemva komhlangano wedale labaphathintambo ele Cabinet umpathintambo wezokwethulwa kwemibiko uNkosikazi Monica Mutsvangwa, uthe kuqakathekile ukuthi elizweni kube lokuthula ngakhoke abantu kumele batshiyane lomkhuba wokukhwabitha udlakela besetshenziswa ngabanye abantu abalenjongo zabo ezingelani lamalungelo abo.

Ngakhoke ukhuthaze abantu ukuthi bengavumi ukungena emigwaqweni bephatheka ekutshengiseleni okuqoqwa ngabe MDC ngolwesihlanu njalo uhulumende uzathatha amanyathelo wonke awenelisayo ukulondoloza ukuthula elizweni.

Ebuzwa ngokuthi uhulumende uzavumela na, ukutshengisela kwabeMDC lokhu, uNkosikazi Mutsvangwa uthe isisekelo sombuso siyavumela ukutshengisela kwabantu, okuqakathekileyo yikuthi abatshengiselayo kumele basebenzise ilungelo labo kodwa bengephuli imithetho yelizwe.

Umpathintambo wezamabhizimusi lamafekithali, uMnu. Mangaliso Ndlovu, uthi kuqakathekile ukuthi abantu bakhulumisamisane ngokubahluphayo kulokuqala udlakela ngokutshengisela esiba isibonelo sodlakela oludale umonakalo omkhulu omkhulu ngoZibandlela kube lokutshengisela. Uqhubeke ethi ngeviki edluleyo uhulumende kulaph enelise ukuphathisa abaninibhizimusi ngoncedo lwezigidi lezigidi zamadollar, ukuze benelise ukuvuselela umsebenzi.

Unkosikazi Mutsvangwa ubike njalo ukuthi umpathintambo wendaba zasekhaya olukhokhela uhlangothi lokubhaliswa kwabantu oluka Registrar General uMnu. Cain Mathema, wethule umbiko othi umsebenzi wokudindwa kwengwalo zokuhambisa zamapassport usunganeno njalo lihofisi isisenelisa ukudinda ama pasipoti angamakhulu athoba minwe mibili ngelanga isuka kwangamatshumi ayisithupha ngelanga. Uthi konke okudingakala ukuthi amapasipoti alungiswe sokuthengiwe umsebenzi usuqalile

Abehofisi kaRegistrar General babikwa besithi bazasebenzisa abenkampani kahulumende edinda imali eye Fidelity Printers ukuze bancede ukudinda amapasipoti ukwenzela ukuba kwehliswe inane labakuluhlu lwababhalisa ukuwathola abangamazinkulungwane zingamakhulu amathathu.

please wait

No media source currently available

0:00 0:02:18 0:00

Facebook Forum

XS
SM
MD
LG