amalinks wokungena

‘Uhulumende weZanu PF Seyehlulekile Ukubusa eZimbabwe’

  • Bennedict Nhlapho

UMongameli Robert Mugabe uthakazelela uzibuse eZimbabwe.

Lonyaka iZimbabwe ithakazelela iminyaka engamatshumi amathathu lesikhombisa kazibuse ngesikhathi kulobunzima obukhulu kwezomnotho kanti ngakolunye uhlangothi kubhekwe ekhethweni olukhulu lomnyaka ozayo.

Izizalwane zeZimbabwe kweleSouth Africa zithi uhulumende weZanu PF useyesule yonke inkululeko etholakele ngo 1980 ngakho ukhetho luka 2018 yilo kuphela ithemba lokubuyiselwa kwaleyo nkululeko.

Ngesikhathi iZimbabwe ithola uzibuse ngo 1980, ibihlonitshwa ngamazwe amanengi ngempumelelo yayo kwezokulima lezenjiwayo. Idola leZimbabwe belidlisana imbuya ngoluthi lelaseMelika kanye lePound laseBilithane. Amazwe asezansi yezwekazi leAfrica ayethi nxa engahlaselwa yindlala azokhongozela eZimbabwe.

Zimbabwe Independence Anniversary
Zimbabwe Independence Anniversary

Izizalwane zeZimbabwe kweleSouth Africa zithi bonke lobu bunono belizwe sebubhidlizwe baphela nya, ngababusi bebandla leZanu PF, kwabangela ubunzima obukhulu okokuthi akusaqondanga ukuthi kuthiwe iZimbabwe yamthola uzibuse.

Isizalwane seZimbabwe, uMnu. Qhubekani Msebele, uthi kunengi labantu eZimbabwe ilanga likazibuse likhefunje lokuthi bengayi emsebenzini. Uthi inkululeko yatholwa kuphela yilabo ababusayo.

“Inkululeko noma independence elizweni lakithi kusese libizonje. Asisabali isimonje kuphela ukutshabalala komnotho, abantunje indlela abaphila ngayo elizweni lakithi kunokwesaba. Eyethu inkululeko asikayitholi. Yisikhathinje sokuthi abantu bakithi basukume bananzelele ukuthi istruggle sethu namhlanje esibhekane laso kuyini.”

UMnu. Khulumani Njayi odabuka eHwange yena uthi okwenzakala eZimbabwe yikuthi kwantshitshwa abacindezeli abamhlophe ababekhona kwafakwa laba abensundu esilabo manje.

“Kunzima kakhulu kuzulu weZimbbawe ukuba athakazelele uzibuse ngendlela eyiyo ngoba bona basebunzimeni obukhulu obufana lokuswela imali emabhanga, ukuswelakala kwemisebenzi yona esilesikhathi ingatholakali kweleZimbabwe, ukuswelakala njalo kwelungelo loluntu eZimbabwe khona okwenza abantu bengasathembi uhulumende.”

Umgcinisihlalo webandla le Progressive Alliance of Mthwakazi Unions (PAMU), uMnu. Clement Ncube , uthi lihlazo ukubona ukuthi ngemva kweminyaka engamatshumi amathathu lesikhombisa iZimbabwe isezandleni zabansundu iphansi kwesimo esibi kangaka.

Uzulu ukhala ngokungakhululeki eZimbabwe.
Uzulu ukhala ngokungakhululeki eZimbabwe.

“Konkenje akukho okucacayo ukuthi kuyiwaphi. Izwe nje lifile. Abakhokheli nxa begula bayangaphandle, belatshwa ngaphandle, abantwababo bafunda ngaphandle. Ucelebrator ini? Awulale cent yakulelo lizwe! but uthi uyacelebator. Uzibuse wani ungakwazi ukuzibusa? Izwe libuyele emuva 50 years kusukela ngomnyaka ka 1980.”

UMnu. Ncube uthi kuyamethusa ukuzwa kulabathi bayathokoza ngabakulethelwe yinkululeko yeZimbabwe.

“Ukuhlupheka, ukuswela imisebenzi, akungeneki ezibhedlelaakulamithi, akulabodokotela akulanerse. Ezikolweni sibona kwezinye indawo sibona abantu kuthiwa sebebhadala I school fees ngembuzi. Yinto bani leyo? From top to bottom kufile eyikho into ecacayo. Zimbabwe is a failed state, so there is nothing to celebrate laphaya.”

Kodwa-ke umculi weZimbabwe odumileyo uZinjaziyamluma uthi akulunganga ukuthi nxa ugezisa umntwana ungabona amanzi esengcolile ubusuchitha konke lomntwana.

“Siyabonga kakhulu ukuthi ilizwe lethu lathola ukukhululeka, kwacelebratwake independence ngale date ecelebratwa ngayo. Engingakutsho yikufisa ukuthi mhlawumbe izinto zibuye zibuyele esimeni mhlawumbe kuhambe kahle konke.’

UNkosikazi Maud Muzenda, umkamuyi uSimon Muzenda, owayengumsekeli kamongameli welizwe leZimbabwe.
UNkosikazi Maud Muzenda, umkamuyi uSimon Muzenda, owayengumsekeli kamongameli welizwe leZimbabwe.

Ngakwelinye icele isizalwane sePlumtree umnumnzana Big Foster Nkomose uthi kufanele kube lizilo ukusebenzisa ibala elithi uzibuse nxa kukhulunywa ngeZimbabwe.

‘Singabizale into esinayo sithi yi independence, sizoyenza abantu abazi ukuthi independence yini basihleke ngoba yilapho okwaqala khona I problem ngo 1980. Kwakhululeka uMnangagwa, kwakhululeka uMugabe, kwakhululeka yonke leya genge yonaleya. U Smith wayekwazi ukuthi noma ngilwa lalaba bantu kodwa ilizwe akumelanga ngilibulale.’

Lobanje abanye besithi lolukhetho kalusoke lulethe nguquko ngenxa yokuqilibezela okuhlala kusiba khona, abanye bathi ngalesisikhathi sembuso yentando kazulu, kuzafanele kwenziwe konke okusemthethweni okungenza impumela yalolukhetho iveze xathu intando kazulu.

Facebook Forum

XS
SM
MD
LG