Ukhetho lokudinga usomlomo wedale lephalamende luzakwenziwa ngoLwesibili njalo icele leMDC elikhokhelwa nguMnu Welshman Ncube lithi amalunga alo azavotela ozamela iMDC kaMnu Morgan Tsvangirai, uMnu Lovemore Moyo.
Ibandla likaNcube belinqume kumaviki amabili edluleyo ukuba amalunga alo kasoze avote kulolu khetho.
Kodwa unobhala jikelele walelibandla uNkosikazi Priscillar Misihairambwi-Mushonga uveze ukuba baguqule isinqumo lesi ngemva kokunanzelela ukuthi amapholisa akhanya ebopha amalunga eMDC kaTsvangirai edale lephalamende ngenjongo yokuncedisa iZanu PF ukuba inqobe kulolukhetho.
UMnu Simon Khaya Moyo nguye ozancintisa kukhetho lwakusasa emele iZanu PF, kuthi uMnu Lovemore Moyo uzamela iMDC kaTsvangirai.
Okhokhela icele leMDC elikhokhelwa nguTsvangirai edale lephalamende uMnu Innocent Gonese uthe ulethemba lokuba uMnu Lovemore Moyo uzanqoba kulolukhetho njengoba selosekelo lweMDC kaNcube.
Kodwa umkhokheli weZanu PF edale lephalamende uMnu Joram Gumbo uthe bakhangelele ukuba ilunga labo, uMnu Simon Khaya Moyo anqobe.
