amalinks wokungena

Breaking News

Ukhetho Lulakho Ukwenziwa Ngo2013 - Chinamasa


Umphathintambo wezemithetho njalo eyisiphathamandla sebandla leZanu PF uMnu Patrick Chinamasa uthi kunengi okusamele kwenziwe andubana kuqhutshwe ukhetho olulandelayo, esithi ngokubona kwakhe ukhetho lolu lulakho ukwenziwa ngomnyaka ozayo kumbe ngo2013.

Abamela iZanu PF leMDC kunkulumo zokulungisisa okuhluphayo, abagoqela uChinamasa ngokwakhe bavumelene kunsukwana ezedluleyo ukuthi ukhetho lolu akumelanga lwenziwe lonyaka.

Kugwalo lokucanda indlela yokhetho alulobe kumaviki edluleyo, amabandla la avumelene entweni ezithile kodwa ehluleka ukuvumelana kokunye okugoqela udaba lwamalunga eZimbabwe Electoral Commission.

IMDC ifuna ikomishini le idilizwe ibunjwe kakutsha, okuyinto ephikiswa libandla leZanu PF.

IMDC ifuna njalo abomvikela, abagoqela amapholisa lebutho, babanjwe ngamandla ukwethula umbiko wokuthi bazasilandela isisekelo sombuso ngokugcweleyo, njalo bahloniphe imithetho yelizwe.

IZanu PF iyakwala lokhu isithi akulabandla lezombusazwe elimele livunyelwe ukubamba abomvikela ngamandla ukwethula imbiko ephathelane lezombusazwe.

Ingcwethi zithi umhlahlandlela lo, awuyibeki sobala indlela emele ilandelwe njalo awutshiyananga nje lesivumelwano seGlobal Political Agreement.

Ukuhlaziya loludaba sixhume ingcwethi ecubungula ezombusazwe uMnu Brilliant Mhlanga.

XS
SM
MD
LG