Umgcinisihlalo omutsha wekhomishini ebona ngezokhetho eye Zimbabwe Electoral Commission (ZEC), uJustice Priscilla Chigumba, wenze isifungo sokuqalisa umsebenzi ngoLwesine lapho athembise ukuthi uzazama ngamandla akhe wonke ukuthi kwenziwe ukhetho olubalulekileyo lonyaka eZimbabwe.
UJustice Chigumba, ofungiswe nguMongameli Emmerson Mnangagwa emkhosini owenzelwe esigodlweni sakhe seState House eHarare, uhle waveza ukuba ukhetho luzoqhutshwa kungakafiki uNhangula lonyaka.
Utshele intathelizindaba ngemva kokugcotshwa kwakhe ukuthi uzaqhuba umsebenzi wakhe ngemfaneli njalo ukhangelele ukuthi kuzakwenziwa ukhetho olubalikelileyo.
Wengeza esithi ikhomishini yeZEC izaqhubeka ikhulumisana labamabandla ezombusazwe aphikisayo, wona akhala ngokungaphathwa kuhle.
Abakhulumisane lalomsakazo bathi lanxa belijabulela inyathelo elithethwe nguMnangagwa, ukukhetha uChigumba, ethatha isikhundla esatshiywa nguJustice Rita Makarau, kungekho okutsha azokwenza ngoba ezolandela izifiso zomkhethileyo.
UMnu. Bekezela Gumbo, yingcwethi ecubungula ezombusazwe esebenzela inhlanganiso eye Zimbabwe Democracy Institute.
UGumbo uvumelana lombono othi kumele kube ngezimeleyo linhlanganiso ye ZEC, ukuze iqhube umsebenzi ngemfanelo.
UJustice Chigumba uthatha isikhundla esitshiywe ngu Justice Rita Makarau, yena otshiye umsebenzi ekususweni embusweni kowayengumongamei Robert Mugabe.
UMnangagwa uthethe lelithuba ukugcoba ngokusemthethweni amalunga e khomishini ezobona ngezomhlabathi emadolobheni eye State Land Commission akhethwe nyakenye kodwa elindele ukufungiswa ukuqala umsebenzi.
Amalunga akule Commission ekhokhelwa nguJustice Tendai Uchena njengomgcinisihlalo wayo, abalisa uHeather Chingono, Tarisai Mutangi, Andrew Mlalazi, Petronella Musarurwa, Stephen Chakaipa lo Vimbai Nyemba.
