Ukudonselana phakathi kweMalawi lomanyano weAfrican Union phezu kodaba lukaMongameli weleSudan uMnu Omar al-Bashir sokubangele ukuthi umhlangano weAU obumele wenzelwe eMalawi ngenyanga ezayo ususwe kulelolizwe.
EleMalawi beliqina ngokuthi uMongameli al-Bashir engeza kulumhlangano lizambopha ngoba edingwa ngumthethwandaba weInternational Criminal Court phezu kwamacala okubulala empini yeDafur.
Umsekeli kaMongameli weMalawi uMnu Khumbo Kachali utshele intathelizindaba ukuthi ngenxa yokudonselana lokhu, iAfrican Union ithi lumhlangano suzakwenzelwa eEthiopia kusukela kumhlaka 9 kusiya kumhlaka 16 ngenyanga ezayo.
Obengumkhokheli weMalawi obhubhe kunyanya ezedluleyo uMnu Bingu wa Mutharika ucunule amazwe angentshonalanga nyakenye eze avumele uMnu al-Bashir ukuza kulelolizwe engabotshwa lanxa iMalawi ililunga leInternational Criminal Court.
Osekhokhela lelo lizwe uMongameli Joyce Banda uthi kasoze akuvumele lokhu ngoba kulakho ukuphazamisa ubudlelwano belizwe lakhe lamanye amazwe. Uthi engavele aze eMalawi uMnu al-Bashir, bazampopha bamuse kumthethwandaba weICC.
Inengi lithi okwenziwe yiMalawi kungumzekeliso omele ulandelwe ngamanye amazwe ikakhulu eleSouth Africa kulandela isinqumo seGauteng High Court esokuthi kumele lelolizwe libophe iziphathamandla zeZimbabwe ezetheswa icala lokwephula amalungelo oluntu nxa zithe zangena kulelolizwe.
Isikhulumeli seMDC ekhokhelwa nguMnu Welshman Ncube, uMnu Nhlanhla Dube uthi iMalawi izithola isesimeni esinzima kakhulu ngoba ikhanya siphazamisa ubudlelwano bayo leAfrica ngenxa yokufuna ukujabulisa amazwe angentshonalanga ngoncedo alipha lona.
Kodwa ingcwethi ecubungula ezombusazwe uMnu Effie Dlela Ncube uthi uyitshayela ihlombe iMalawi. Uphinde wasola iAfrican Union ngokuvikela ontando kayiphikiswa.
