amalinks wokungena

Breaking News

Umongameli Mugabe Usola Ukufuthelana Ebandleni Lakhe leZanu PF


Uzulu we Harare uthi lanxa ewamukela amazwi kamongameli Robert Mugabe, wokusola udaba lokudabuka phakathi kwebandla lakhe leZanu PF, basalindele ukubona ukuthi uzaluphatha kanjani lona selugxile impande kangaka, ngoba kunguye njalo lebandla lakhe abekade bekulandula lokho asekuvuma kathesi.

Kunxoxo lentathelizindaba, ngesikhathi sendaba zakusihlwa emsakazweni kamabonakude wenkampani yeZimbabwe Broadcasting Corporation, ehletshunwe kuhlelo lokunanza usuku lokuzalwa kwakhe, olusakazwe ngoLwesine kusihlwa, umongameli Mugabe obekhanya engajabulanga ngesikhathi ebuzwa phezu kokuhlephuka kwebandla alikhokhelayo,usole labo athi babangela loludubo ethi lokhu kungaphetha sekubangela ukungezwani kwamalunga,abantu sebekhethana ngezigaba langokuthi balandela luphi uhlangothi njalo lukhokhelwa ngubani.

Unkosazana Zanele Dube oyisakhamuzi se Gunhill, eHarare, utshele iStudio Seven ukuba kawamangalisi lamazwi asekhulunywa nguMugabe ethi kusobala ukuba ubevele esazi ukuba lukhona ebandleni lakhe loludubo kodwa asekudinga kathesi yindlela angayisebenzisa ukuluqeda.

Kodwa esinye sezakhamuzi zeCraneborne eHarare njalo,umnumzana Cosmas Ndlovu uphikisana lalombono kaMaDube, ethi inkulumo kamongameli Mugabe kaitsho lutho, kuyikukhuluma nje komuntu omdala ngoba esazi mhlophe ukuba akukho angakwenza ukuluqeda loludubo oselugxile impande ku Zanu PF.

Inkokheli kwezokholo zona zinikeze umbono owahlukileyo kokaNdlovu ,zithi leli linyathelo elincomekayo elithethwe nguMugabe,ukwambulela ukuqalwa kokukhulumisana phezu kwaloludaba, obekunyenyezwa ngalo ngoba inkokheli yeZanu PF ibisesaba ukuxoxisana ikhululekile phezu kwalo.

Lokhu kugcizelelwe ngumkhokheli weBible Ministries eHarare umfundisi Wyson Dutch yena othi, osekukhangelelwe nguzulu ngemva kwalamazwi, yikubona ukuba uyothatha manyathelo bani ukululungisisa umongameli Mugabe.

Edabeni oluphume endabeni zikamabonakude we ZBC izolo kusihlwa, umongameli Mugabe othakazelela ukufikisa iminyaka engamatshumi ayisitshiyagalo lunye- 90 years yokuzalwa kusasa, utshengise ukukhathazeka phezu kodaba lokudabuka phakathi kwebandla lakhe ethi kuyingozi njalo engasoze akuvumele yena njengomkhokheli.

Lamazwi kaMugabe aza ngesikhathi sekulemibiko eveza ukuba kulokudabukana phakathi kwebandla le Zanu Pf osekubangele ukuba lamaqembu amabili abalisa elikhokhelwa ngumsekeli kamongameli unkosikazi Joice Mujuru lonobhlala kuhlangothi lwezemithetho kubandla engumphathintambo wogatsha lwezenzakala edale le Phalamende kanye lokulondolozwa kwemithetho umnumzana Emmerson Munangagwa.

Kodwa ababili laba bahlezi bekulandula lokho bethi akusiqiniso ukuba sebehlephune ibandla le Zanu Pf laba yiziqephu.

Ingcwethi kwezombusazwe zihlezi zithi vele kubangwa sona isikhundla sikamongameli nxa esethe watshiya umsebenzi lanxa u Mugabe ethi akayikutshiya umsebenzi okwamanje.
XS
SM
MD
LG