amalinks wokungena

Breaking News

Ukugwetshwa Kwabasekeli Bethu Yibufakazi Bokuthi Imithethwandaba Ayithathi Hlangothi - Zanu PF


Ibandla leZanu PF lithi ukugwetshwa kwabasekeli balo abane ngoMvulo ukupika okweminyaka elitshumi lathobaminwe mibili ngecala lokubulala umsekeli weMDC ngo2009 kuveza sobala ukuthi imithethwandaba isebenza kuhle ingathathi hlangothi.

IMDC yiyo ehlezi isethesa imithethwandaba icala lokusekela ibandla leZanu PF.

Umahluli weHigh Court, uMnu Nicholas Mathonsi ugwebe indodana kasibalukhulu weMidlands uMnu Jason Machaya labasekeli balelibandla abane ngemva kokutholakala belecala lokubulala umsekeli weMDC uMnu Moses Chokuda.

Abagwetshiweyo ngabathi uFarai Machaya, Abel Maphosa, Edmore Gana loBothwell Gana.

Ngeviki edluleyo umantshi weMasvingo uthole umsekeli weZanu PF uMnu Gilbert Mavhenyengwa elecala lokudlwengula umsekeli weMDC wamgweba ukupika okweminyaka engamatshumi amabili.

Umkhokheli weZanu PF edale lephalamende uMnu Joram Gumbo uthi izigwebo eziphiwe abasekeli bebandla lakhe ziveza ukuthi omantshi labahluli baqhuba umsebenzi wabo kuhle njalo abasekeli iZanu PF.

Unobhala jikelele wogatsha lwabatsha kuMDC ekhokhelwa nguMnu Morgan Tsvangirai uMnu Promise Mkwananzi uthi bayajabula ngokujeziswa kwabasekeli beZanu PF laba.

XS
SM
MD
LG