Odokotela baqhubekela phambili bekhalala umsebenzi ezibhedlela zikahulumende osekutshiye impilo zabanengi zisengozini.
UActing Clinical Officer esibhedlela seMpilo Central Hospital, uDokotela Xolani Ndlovu uthi isimo asimanga kahle kodwa benza konke okusemandleni akhe ekwelapheni abantu kanye lokubelethisa omama.
“Odokotela baqhubekela phambili bekhalele umsebenzi kodwa senza konke okusemandleni ethu. Isibhedlela sabomama ababelethayo sisebenza kahle, silabo odokotela lobanje besilela njalo thina omama abazobeletha abahlawuli lutho yikho uthola bebanengi abazobelethela lapha bebalekela ukuhlawula emakilinika. Siyamukela bonke abagulayo kodwa abangaguli kakhulu sibalayela ukuba bayekwelatshwa emakilinika aseduze labo. Lamhlanje sibelengozi yebhasi ebulele abantu ababili kumngwaqo oya eHarare lapha sesamukele abalitshumi lasikhombisa kuthi abathathu sebelalisiwe ngakho siyazama ukusebenza lobanje odokotela bekhalele umsebenzi.”
Isakhamuzi sakoBulawayo, uMnu. Elliot Nyoni uthi bayagulelwa kodwa bayazithenela imithi njalo eminye bayithenga ngedola leMelika.
"Siyagulelwa lapha, isiulane sethu yithi esisithenela imithi njalo siyithenga ngedola lemelika sicela uhulumende angenele noba impilo yabantu isisengozini."
UMnu. Yonasi Sigeza othwala abantu uthi ulusizi ngoba inengi labantu abathwalayo baphuma begula esibhedlela bayefela emakhaya.
“Ngikubhizimusi lokuthwala abantu inengi labo likhutshwa esibhedlela begula bayefela emakhaya. Lapha abantu bahlawuliswa imali yemelika, imali ayitholakali kuthi labantu esibathwalayo bakhala nemali, sicela uhulumende angenele aphe odokotela abakufunayo."
Isimo ezibhedlela simi kubi, abantu abagulayo inengi labo liswele ukuhlolwa ngodokotela kuthi labo abakhona bandelwa ngumsebenzi okulakho ukuphazamisia isiphatho sezigulane.
Odokotela baqhubekela phambili bekhalele umsebenzi bethi uhulumende kalungisise izikhalazo zabo andubana babuyele emsebenzini.
