amalinks wokungena

Breaking News

Kufa Umtshayeli weUber Kulandela Ukulwa Kwabatshayeli Bama Uber Labama Meter Taxis


Abatshayeli beUber bathwele nzima kwele South Africa.

Sekuqhamuke impi phakathi kwabatshayeli bama Meter Taxi labenza umsebenzi ofanayo besebenzisa ulwazi lwangalez'insuku kumakhalekhukhwini iApp eye Uber leye Taxify okuyimisebenzi eyenziwa linengi lezizalwane zeZimbabwe kweleSouth Africa.

UBenedict Nhlapho uxoxa labeZimbabwe abenza lo umsebenzi ngalo umbango wezihambi ngemva kokuba omunye umtshayeli we Uber etshiselwe emoteni yakhe wayafela esibhedlela.

Impi phakathi kwama meter taxi labatshayeli be Uber le Taxify isitshiye inengi labeZimbabwe abaziphilisa ngokutshayela lezi imota besesaba okumangalisayo.

Abama meter taxi abatholakala ikakhulu endaweni zokudlela, emabhawa, lezinye ezilabantu abanengi belindele izihambi bethesa abe Uber leTaxify umlandu wokubathathela umsebenzi. Esinye isizalwane seZimbabwe ongumnini weMeter taxi eJohannesburg umnumnzana Freeman Ngwenya uthi impi esiqhamukile ayingeke iphele abe Uber laba bengayekanga ukwenza lo umsebenzi.

“Akusoze kusize ukuthi siyeke ukulwa ngoba sizophila njani thina? Sizobhadala ngani ama rent? Abantwabethu sizobaphani ngoba abantu abasagibeli lezi imoto zethu sebegibela u Uber lowo. Thina abantwabethu sibafeeder ngani? Yikho lokhu esiphila ngakho akukho okunye. So kungela okunye esiphila ngakho sithembele kukho khonokho esikwenzayo manje asiselamsebenzi. Asisasebenzi lutho uUber nguye osesebenza. Lathi sinje angeke sivume ukuphucwa umsebenzi kanjalo.”

Omunye wabatshayeli beUber ubhubhe kuze kutshiswe imota yakhe.
Omunye wabatshayeli beUber ubhubhe kuze kutshiswe imota yakhe.

IUber okuyinkampani esemazweni amanengi isebenzisa ulwazi lwakulezi insuku ukudinga abafuna ukugada imota lezi. Inengi lezizalwane zeZimbabwe bathenga imota zabo basebeqala ukuthwala abantu phansi kwe Uber. Yonake ilohlelo lwebulenjini be internet obenza oyidingayo ayithole khona kuinternet imlande yiloba kuphi lapho akhona, kantike ngemali ephansi okwedlula abama meter taxi.

Isizalwane seZimbabwe umnumnzana Jabulani Ndlovu uthi angeke avume ukwethuselwa ngamanye amadoda ngoba wachitha imali enengi ethenga imota ukuze aselele imuli yakhe ngokuthwala abantu phansi kohlelo lweTaxify layo esebenzisa uhlelo lwe internet.

“Balwisa umuntu owrongo bekungamele nga bashaya thina ngoba umuntu owenza leyonto ngu Taxify okanye ngithi ngu Uber. Bekuyibona abantu okufanele ngabe baya kubo bayeshaya bona. Bangashayi thina ngoba thina lathi sifuna isinkwa. Angeke uhlale ekhaya abantwana belambile ubabhekile imoto ikhona. Labo ukuthi bavuke bayekuma emgwaqweni bafuna imali. Nathi into esiyifunayo yimali.”

Osekusesabisa yikuthi sekulezehlakalo ezinengi zokudubulana phakathi kwebatshayeli, ezokutshayana kanye lokubulawa kwamafasitela ezimota osekutshiye labeZimbabwe abasebenzisa lezi mota sebesesaba ukuzigada. Isizalwane seZimbabwe umnumnzana Mchasiseli Gwazagwaza uthi umlandu ukibo abama Meter taxi ukuthi babone ukuthi izikhathi ziguqukile labo sekufanele baguqule indlela abasebenza ngayo.

“IUber ingene nge technology. Langamafoni wethu siyakwazi ukuyibiza isilande lapho esikhona. Bona bama endaweni eyodwa njalo indawo abama kuzo zinobugebengu isikhathi esiningi so abantu ba prefeya i Uber ngenxa yokuthi iba safe empilweni zabo.

Bayalwa abatshayeli bezimota zeUber lalabo abalama meter kwele South Africa.
Bayalwa abatshayeli bezimota zeUber lalabo abalama meter kwele South Africa.

UMnumnzana Ndlovu uthi ukusebenzisa udlakela ngeke kubasize abama meter taxi kodwa inguquko yiyo edingekayo.

“Okwenza balwe yikuthi they don’t have enough funds. But kungabantu abanokuhlakanipha ngabe balanda u Taxify bathi lalela, njengoba wena usuthethe umsebenzi wethu, sinikeZe izimoto sizaba lendlela yokuthi sikubhadale, nabo bangene basebenze ngoba imali esiyenza kutaxify inengi ukudlula imali yokuba uma unga uhleli emgwaqweni uzolinda umuntu oyedwa.”

Kusenjalo uhulumende uselungenele loludaba ngokuqala inkulumo zokukhumisana umlotha phakathi kwamacelela womabili. Eminyakeni edluleyo kuke kwaqhamuka impi yemitshova kweleSouth Africa kwafa abantu abanengi kakhulu.

Facebook Forum

XS
SM
MD
LG