amalinks wokungena

'Ukumisa Amabhasi Ukuthi Athwale Abantu Emini Kungaphazamisa Izihambo'

  • Martin Ngwenya

Ababhasi abulala abantu okumangalisayo.

Inyathela lika hulumende weZimbabwe lokumisa amabhasi ukuthi ahambe ebusuku, nomanje lincomeka, lizalimaza inhambo zabathenga impahla phandle kwelizwe besiyayithengisa ekhaya.

Uhulumende weZimbabwe uthi sesifikile isikhathi sokumisa amabhasi ukuthi ahambe ebusuku, ukwela ukuthi kuphungulwe inani lezingozi zomgwaqo ezanzakala sonke isikhathi.

Wethule umbiko uhulumende ukuthi useqalisile isibanga sakuqala sokuthatha amanyathelo okuvimba ukuhamba kwamabhasi nxa sokumnyama phakathi kwehola lesitshiya galo lunye ntambama kusiya ihola lelesihlanu ekuseni (9pm-5am).

Abantu abanengi balahlakelwa yimiphefumulo engozini ezinenginengi ezomgwaqo, ezigoqela amabhasi athwala abakubhizimusi lokuthenga imphahla ngaphandle kwelizwe besiyathengisa eZimbabwe.

Noma kulinyathela elincomekayo, abamabhasi bakhala ngokuthi lokhu kulakho ukubona izihambi zisebenzisa ezinye indlela zokuhamba.

Omunye osebenza emabhasini ahamba phakathi kweGaborone leHarare, uMnu. Trynos Ndlovu uthi izihambi zingacina zisebenzisa imota ezincane ngoba amabhasi engabaphuzisa uma ehamba emini kuphela.

"Siyavuma, linyathela elithethwe kukhangelwe impilo zabantu, kodwa esikubonayo yikuthi izihambi zilakho ukusibalekela uma sesihamba emini kuphela, ngoba imango yakhona imide, yikho besisuka ebusuku sikhangele njalo lokuthi seqe umngcele kuse lesikhathi."

Kukanti omunye ovame ukusebenza amabhasi ahamba ebusuku uthi kade wona eqondile noma nje besesaba ingozi, ngoba besenelisa ukufika eGaborone bethenge emini njalo bebuyele ntambama.

"Sisebenzisa amabhasi ebusuku hatshi ngokuthanda, kodwa ngenxa yokuthi sithola isikhathi sokufika eGaborone kusakhanya, sithenge njalo ntambama sigade sibuyele. Lokhu sekusitsho ukuthi singacina silala, okutsho imali enengi esiyisebenzisayo."

Inhlanganiso emela abakubhizimusi yokuthenga njalo bethengisa imphahla abayithenga phandle kwelizwe, ngoNhlangula lonyaka yacela uhulumende ukuthi amise amabhasi ukuthi engahambi ebusuku.

Ngempelaviki, umqondisi wenhlanganiso yeCivil Protection Unit, uMnu. Nathan Nkomo uthe udaba lolu solungaphansi kwaba phathintambo kuhulumende.

Facebook Forum

XS
SM
MD
LG