amalinks wokungena

Breaking News

IZimbabwe Inanza Ilanga leUN International Day In Support of Torture Victims


EleZimbabwe limanyene lamanye mazwe womhlaba ekunanzeni ilanga lokukhankasela ukuphathiswa kwabahlukuluziweyo olwe UN International Day In Support of Torture Victims.

Bekuhlatshelwa ingoma ngendlela edanisayo embuthanweni womthandazo owenzelwe enkonzweni yeAnglican Cathedral eHarare ngoLwesihlanu ekuseni, lapho abasila kuzehlakalo ezehlukeneyo zokuhlukuluzwa bebelandisa inhlungu ababhekana lazo enyameni lasemoyeni ezilokhe zibahlupha lalamuhla lokhu.

Lanxa baluthola usizo enhlanganisweni ezehlukeneyo ezigoqela eye Councelling Services Unit ( CSU ), zilokhe zibonakala inhlungu ezisezinhliziyweni lasenqondweni, bengahlaliseki ngezehlakalo zokutshaywa kabuhlungu, ezisukela kusikhathi sokhetho luka 2002, abanye sebeyizilima bekhona njalo abadlwangulwayo.

Unkosazana Asiyatu Phiri wase Chakari ngomunye wabahlangana lodubo lokuhlukuluzwa ksukela ngomnyaka ka2002 ngoba kuthiwa usekela ibandla eliphikisayo le MDC-T. Uthi watshaywa kabuhlungu uMaPhiri ngabantu abamhlukuluzayo kabuhlungu lanxa wayezithwele.

UMaPhiri olengane eziyisithupha, uthi kunje balokhe bedliswa imbuya ngoluthi abalandeli bamabandla aphikisayo njengaye kuthiwa ngabebandla labathengisi.

Umnumzana Mathew Mupandaguta waseGokwe eNembudziya ku ward 23 laye uhlangane lezahlakalo zokuhlukuluzwa okwedlulise amalawulo ngemva kokhetho luka 2008.

Yena lemhuli yakhe uMupandaguta beke babalekela umuzi wabo ngenxa yalokho kuhlukuluzwa, kungekho obekusenziwa ngamapholisa ukujezisa izephulamthetho.

Enye yenkokheli enhlanganisweni esebenzelana labahlukuliziweyo laba ukubaphathisa ngendlela ezehlukeneyo, eye Councelling Services Unit ( CSU ),ongathandanga ukubethwa ngegama uxwayisa uzulu ukuba ehlukane lodlakela.

Umgcinisihlalo weCommission ebona ngezokulondolozwa kwelungelo loluntu, eye Zimbabwe Human Rights Commission, umnumzana Elasto Mugwadi uthi lanxa befisa ukulungisisa isimo kwezokuhlukuluzwa, behlulwa yikuba awukho umthetho obapha lawo mandla.

Uzulu lenhlanganiso ezilwela ilungelo loluntu bakhuthaza uhulumende ukuba alobe isivumelwano sokuqeda udubo lokuhlukuluzwa kwabantu emhlabeni.

Umthandazo walamhla wenziwe phansi kwesihloko esikhuthaza ukuphathiswa kwabantu abahlukuluziweyo okwedlulise amalawulo, “The Right to rehabilitate now”. Uqoqwe ngokumanyana kwenhlanganiso ezibalisa eye Right to Rehabilitate, Zimbabwe NGO Forum, Councelling Services Unit, Heal Zimbabwe, ZimRights lohlangothi lwe Zimbabwe Human Rights Commission.

XS
SM
MD
LG