amalinks wokungena

Breaking News

Izakhamizi zeHarare Zithi Akumangalisi Okwenzakala eZBC


ZBC
ZBC
Izakhamizi zeHarare ziveza ukuba okwenzakala enkampanini ye Zimbabwe Broadcasting Corporation kungasinto yakuqala kungatsha zikahulumende ngoba bethi kuyisibonelo somumo wezokungathembeki kukahulumende weZanu PF ohlezi ngomunwe ebeka amazwe angentshonalanga umlandu, ecatsha ngezijeziso ezabekelwa ezinye inkokheli sikhathi sonke ukuba yizo eseziphazamisa umumo kwezomnotho kodwa esekela inkokheli zizenzela santando ezitshaphaza umnotho welizwe, zisehluleka ukuqhuba umsebenzi ngendlela.

Lokhu kuza ngemva kwezehlakalo zokungathembeki kwenkokheli yenkampani ye ZBC lapho osokuvele ukuba bakhona abangasayisebenzeliyo linkampani ye ZBC asebatshiya umsebenzi ngezizatho ezehlukeneyo okubikwa lokhe besalithola iholo uzulu athi kusobala ukuba le yimisebenzi yokungathembeki.

Zithi izakhamizi, kunje amalunga wogatsha lwezokukhitshwa kwemibiko elizweni, izolo babikwa bebeqhuba umsebenzi wokudingisisa ukuba ngempela labo abasebenzela linkampani kuyibo impela ngesikhathi bebabuzisisa ngasikhathi sinye sebesungulile ukutholisa izisebenzi ze ZBC esezidonse okwenyanga ezimbalwa zingaholiswanga.

UMfundisi Wyson Dutch ukhokhela inhlanganiso ye Bible Ministries eHarare ephatheke kunhlelo ezimbalwa okubalisa ukubonisana lozulu nxa ethe wahlangana lendubo iā€“ counselling. Uthi u Dutch lanxa uhulumende obusayo ethi uzimisele ukuluqeda loludubo lokungathembeki elizweni, makungabi ngamazwi kuphela kodwa kubonakale ngezenzo lokho kuzimisela.

Makungabi yikulahlisa uzulu ngoba inkokheli zikahulumende zisazi mhlophe ukuba ludaba olungasoke luyendawo ngoba luzaphelela emoyeni njengalokho osekuthe kwabonakala kwezinye indaba ezifanayo lapho kungekho umadala icala ahlangana lakho.

Wengeze u Dutch ethi ukuxotshwa komuntu oyedwa kungayi kusiza lutho ngoba kusobala ukuba engazange ayiqhube eyedwa leyo misebenzi yokungathembeki njengoba bekhona abangaphezu kwakhe ababalisa I board kanye lenkokheli kugatsha olubona ngezokwethulwa kwemibiko, lezinye inkokheli ezikulenkampani okusobala ukuba beziphatheke emisebenzini yokungathembeki lazo.

U Dutch uthi lungaphela kuphela loludaba nxa uzulu engamesaba uNkulunkulu, ayihloniphe impahla engasiyakhe, asuthiseke ngalokho alakho, esabe umthetho welizwe njalo zibotshwe lezepulamthetho hatshi ukujezisa abaphansi kuphela zona izigangi zitshiywa zisenza santando athi lumkhuba ungomunye waleyo esibhidlize umnotho welizwe.

Umnumzana George Nyoka ohlala emzini we Kambuzuma yena utshengise ukuvumelana lombono kamfundisi Dutch, ethi lokho osekusenziwa nguhulumende kuyikulahlisa abantu njengoba kusobala ukuba kuzaphelela emoyeni wanikeza umzekeliso walokho okuthe kwenzakala kwezinye indaba zokungathembeki kwenkokheli elizweni, okubalisa olwake lwaduma ngesikhathi sabominyaka yabo 80 olwe Willogate Scandal.

Kunje abogatsha olubona ngezokukhitshwa kwemibiko bebikwa bephatheke kumisebenzi yokuqhuba inhlolisiso ukuze kwazakale ukuba ngobani abasebenza kulenkampani ye ZBC, beqhuba msebenzi bani njalo ngaphansi kukabani ngesikhathi linhlanganiso isiqalile ukubhadala lezi zisebenzi imali yazo ebezilokhe zingakayitholi.

Lokhu kuza ngemva kokuphuma kwemibiko eveza ukubakhona kwabangasasebenzeli linkampani njalo bengabatshiya umsebenzi kudala ngezizatho ezehlukeneyo okubikwa lokhe besalithola iholo labo lanxa abanye sekukade babhubha osekumangalise uzulu ofuna kuvezwe ukuba ngubani obezithatha lezizimali kusetshenziswa amagama abo.
ā€‹
XS
SM
MD
LG