Uhulumende usenike umuyi uMnu. Magura Magura Charumbira obengumgcinisihlalo wabatsha kubandla leZANU PF koBulawayo inhlonipho yokuba liqhawe, i-liberation hero.
Ukunikwa kukamuyi uMnu. Charumbira inhlonipho yeqhawe, yena eleminyaka engamatshumi amathathu lane-34, kukhangelelwe ukudala inkulumo emphakathini, njengoba ivame ukuphiwa abalwa kumpi yokukhulula ilizwe kwabamhlophe, njalo kusobala ukuthi umuyi wayengakazalwa ngalesosikhathi.
Incwadi elotshwe ngumongameli Emmerson Mnangagwa, esezandleni zeStudio 7, iveza ukuthi uhulumende nguye ozaqhuba indleko zomgcwabo kanye lenhlalakahle yabantwana bakamuyi.
Incwadi le, esayinwe yisiphathamandla sikahulumende uMnu. Misheck Sibanda, iveza njalo ukuthi uMnu. Charumbira uvela eMasvingo.
UMnu. Charumbira, obhubhe ngoMvulo odluleyo engozini yomgwaqo eNorton, wazakala ngokukhokhela iqembu labatsha elahoza uNkosikazi Grace Mugabe ekhuluma emhlanganweni koBulawayo ekupheleni komnyaka odluleyo.
Owayengumongameli uMnu. Robert Mugabe wathukuthela ngemva kwalesi isehlekalo wathi usezaxotsha owayengumsekeli wakhe uMnu. Mnangagwa esikhundleni amupha sona, ngoba kunguye imbangela.
Umuyi wabotshwa ngemva kwalesi isehlakalo kodwa wakhululwa emthethwandaba umongameli Mugabe esethathelwe intambo zombuso libutho.
Lanxa abathengisa ezitaladini koBulawayo besithi umuyi wayebahlukuluza, isikhulumeli sebandla leZANU PF koBulawayo uMnu. Christopher Sibanda ubikwa encoma isimo sakhe, esithi ibandla lakhe lilahlekelwe ngoba uMnu. Charumbira wayekhuthele.
UCharumbira wake walwisana njalo lamalunga ebandla lakhe, kanye lamakhansila akoBulawayo. Amalunga ebandla leMthwakazi Republic Party athi umuyi wancedisa ukubatshaya lokubahlukuluza beze bebotshwe libutho ngemva kokutshengisela ngodaba lweGukurahundi esontweni okwakukhonza khona umongameli Mnangagwa koBulawayo ngeviki edluleyo.
Ke sizwe amazwi ka Charumbira esaphila:
