amalinks wokungena

Breaking News

Ukususwa Kwabaziphilisa Egodini koBulawayo Kusolwa Ngabanengi


Egodini
Izakhamizi ezingene umhlangano kazulu ngoLwesithathu zisole kakhulu inyathelo lekhansili yakoBulawayo lokuthi kususwe abantu abaziqhatshileyo abasebenzela endaweni edume ngokuthi eGodini lapho esifuna ukwakha indawo yezitolo ezinkulu i-mall kanye lendawo yamabhasi avela kwamanye amazwe zisithi lokhu kuzatshiya amakhulu abantu engasela ndlela yokuziphilisa ngoba engaphiwanga enye indawo yokuyathengisela elabantu abanengi njengale.

Ikhansili yakoBulawayo ithi isijonge ukuguqula indawo yasegodini i-Basch Street Terminus ibeyindawo yamabhasi aya kwamanye amazwe njalo kwakhiwe izitolo ezilonhlonzi okuzabiza imali engangezigidi phose ezingamatshumi ayisithupha - $59 million.

Lokhu kutsho ukuthi bonke abathengisa kulindawo kanye lezimota zemalokitshini ezithwalela kulindawo kuyamele kusuke kusaguqulwa lindawo.
Phose ingxenye yenani labantu elivuka ekuseni lisiyasebenza liziqhatshile kulandela ukuvala kwamafekithali kulelidolobho kanye lokubhidlika kwenotho elizweni lonke jikelele.

Oziqhatshileyo, uMnumzana Edward Ndlovu, uthi lelinyathelo lizaphazamisa impilo zabo bonke abathengisela kulindawo kanye lezimuli zabo eziphila ngemali evela kulindawo.

Uthi abantu abasebenzela lapha bavele bathwele nzima ngoba imali abayitholayo ihle isebenze iphele akula abayibeka eceleni ukuthi mhlana ethe wagula kumbe wangenelisi ukuyathengisa aphile.

Uthi lokhu kutsho ukuthi nxa sebesuswe lapha abayikubalendlela yokuziphilisa ngoba inengi labo livele alilamvumo evela ekhansilini ukuthi lithengisele lapha.

Osebenza kunhlanganiso yezisebenzi i-Zimbabwe Congress of Trade Unions, uNkosazana Barbara Tanyanyiwa, uthi abantu abaziqhatshileyo bavele bathwele nzima ngoba abalawo amalungelo ezisebenzi njalo abala ongabamela.
Uthi ngenxa yalokhu sebesungule inhlanganiso yokumela lababantu ekhangelelwe ukukhulumisane kabanzi lekhansili ukuthi iyozala nkomoni lapho lindawo isayakhwa njalo bazenelisa yini ukubuyela bayethengisela khona mhla iphela.

Umhlangano kazulu lo ungowakuqala kumbukiso walonyaka we Ideas Festival oqoqwe yinhlanganiso kazulu, i - Bulawayo Agenda. Umqondisi walinhlanganiso, uMnumzana Thabani Nyoni utshele lumsakazo ukuthi bajonge ukunika uzulu ithuba lokuxoxisana ngendaba ezikhathazayo ezidinga ukulungiswa.
Uthi kuqakathekile ukuthi abantu babelethuba lokubonisana betshuka indaba ezitshiyeneyo ngoba phela injobo enhle ivele ithungelwa ebandla.

Ukwakhiwa kutsha kwendawo le ye Egodini kukhangelelwe ukuphathwa yinkampani evela e Zansi Africa okuthiwa yiTerracota Private Limited.
Ukuxoxisana kwezakhamizi ngendaba ezitshiyeneyo kukhangelelwe ukuqhubeka kumbukiso lo ozaphela ngoMgqibelo. Indikimba yombukiso lo lonyaka ithi “Re-imagining a Republic of Ideas’.
XS
SM
MD
LG