Isimo somnotho eZimbabwe esingamanga kahle sesidalele ukuthi abanye abantu bahambise labo asebeluphele endaweni zokuhlala ama Old People’s Homes.
Abantu abanengi bathi kabesenelisi ukuphandela labo asebeluphele ngenxa yokuswelakala kwemali elizweni.
Lokhu kuvezwe ngasebekhulile abahlala emizini egcina izalukazi lamakhehla owe Bako reDonhodzo Old People’s Home ose Highfields, eHarare, ekwethekeleleni kwabenhlanganiso ezithi Bus Stop TV, Angels Foundation leRotaracts eye University of Zimbabwe.
Izalukazi lamaxhegu abahlala emzini lo baveze injabulo ngokwethekelelwa ngabenhlanganiso lezi.
Omunye wabo, uMnumzana Maxwell Tendanyi, uthi waswela abangamgcina wacina esehlala endaweni le.
Ukhala ngodaba lwemali othi bebeyithola eyingcosana abangasayitholi manje. Uthi isizungu yiso esesimbulala kakhulu lanxa besenza imisebenzi abayanelisayo okufana lokulima izivande.
Abanye bakhe bathe basuswa ngekhaya yizihlobo ezazingasenelisi ukubagcina. Bathe lokhu kwabangelwa yikuswelakala kwemali eZimbabwe.
UNkosikazi Constance Mkhize, omunye wabaqondisi womuzi we Bako reDonhodzo Old People’s Home, uthi ilizwe kalilamali ngakho-ke sebephila ngokukhangeza kwabalozwelo sikhathi sonke.
Sekuvele njalo ukuba inani labesilisa asebeswela obagcinayo sebeluphele, liqonge kakhulu kulelabesifazane lanxa izizatho zingakazakali.
Phakathi kwabagcinwe eBako reDonhodzo Old People’s Home, abangamatshimi amabili lanye, ababili kuphela ngabesifazane.