amalinks wokungena

Breaking News

Ukuswelakala Kwemali Yokuvuselela Amankampani koBulawayo Kuvusa Uzulu Umhlonga


Ukuvalwa kwamafekithali koBulawayo kuqhubekela phambili lonyaka. Zibalelwa ngaphezulu kwenkulungwane izisebenzi esezimiswe umsebenzi kunyanga ezimbili ezedluleyo kuthi-ke amankampani asele esebenza aseyehlise isikhathi somsebenzi okokuthi izisebenzi sezibuya okwamaviki amabili kuphela ngenyanga.

Ababengalazi kuhle idolobho lakoBulawayo uma besuka emaphandleni kwakuthiwa bangazikhathazi ngoba bazabakwazi ukuthi sebefikile uma sebebona intuthu ezithunqayo ezazibonakala lisekude idolobho.

Zazithunqa ngempela ebusuku lemini intuthu ezacina ziliphe ibizo elithi ‘kukontuthu ziyathunqa’ lelidolobho.

Umongameli Robert Mugabe ngomnyaka ophelileyo usungule uhlelo lokunika izikwelede amankampani adilikayo olwe Distressed and Marginalized Areas Fund koBulawayo. Ukwethulwa kwalesi sikhwama nyakenye edilini elimangalisayo besokulethe ithemba lokuthi intuthuko isizaphenduka ngempela kontuthu ziyathunqa.

Kodwa-ke akulankampani esithe yathola usizo lokulungisa impahla kuze kubelamhlanje njalo amanye lokhe ethwele nzima.

Uhulumende eseyehlulekile ukufaka izigidi ezingamatshumi amabili amadollar eMelika - $20 million yokubumba isikhwama semali lenkampani ye Old Mutual Insuarance Limited.

XS
SM
MD
LG