amalinks wokungena

Ukuswelakala Kwemali Akubhidlizanga Kakhulu Ezemidlalo

  • Joseph Njanji

UShadreck Mlauzi

Isimo somnotho singabe singamanga kuhle elizweni kodwa amaqembu amela ilizwe leZimbabwe atholakale esenelisa ukuphatheka kumncintiswano eyezinga laphezulu ngomnyaka ka 2016.

Elinye lalawa maqembu ngele Mighty Warriors lona eliphatheke kumidlalo ye Olympics kwele Brazil ngenyanga kaNcwabakazi laphinda njalo layamela ilizwe kumidlalo yokudinga intshantshu zezwekazi lase Africa eqhutshelwe elizweni le Cameroon ngenyanga kaLwezi.

Alisaqhubakanga kuhle kodwa leliqembu le Mighty Warriors kumncintiswano yomibili njengoba liphenduke lingazange linqobe ngitsho kowodwa kuyo yonke imidlalo eliphatheke kuyo.

Ekhuluma ngemva komncintiswano we LM Auctioneers ensukwini ezedluleyo umqeqetshi weqembu le Mighty Warriors uShadreck Mlauzi uthe kumele kuthuthukiswe imfundiso yabaqeqetshi abasebenza lamaqembu abesifazane ukuze ibhola labesifazane lithuthuke elizweni.

MIGHTY WARRIORS

Kucele labesilisa, iqembu lama Warriors liphumelele ukuyadlala kumidlalo yokudinga intshantshu zezwekazi lase Africa ezaqhutshelwa elizweni lase Gabon ekuqaleni komnyaka ozayo.

Amalungiselelo aleliqembu ngesikhathi somkhankaso abengahambi kuhle kodwa lenze izimanga laba yilo lodwa iqembu eliphuma emhlubulweni wezansi yezwekazi lase Africa elizaphatheka kumidlalo ye Afcon ngenyanga ka Zibandlela.

Inhlanganiso ebona ngokuqhutshwa komdlalo wenguqu eye Zifa iqhubekele phambili ibhekane lodubo lwemali njalo kuke kwaba lemizamo eyokubalekela izikwelede zayo ngokuguqula ibizo isiba yi Nafaz phakathi laphakathi komnyaka kodwa lokhu kwehlule.

ABAQONDISI BEQEMBU LEHIGHLANDERS

Umnyaka uphela nje kulokufuthelana phakathi kwenkokheli zomdlalo wenguqu elizweni osekudale ukuba inkokheli ye Zifa ixotshe abantu abambalwa ebholeni abagoqela umkhokheli weqembu le Highlanders uPeter Dube kanye lesiphathamandla saleliqembu uNdumiso Gumede.

Lesisehlakalo sidale inkulumo ethi inkokheli yeZifa izama ukubhidliza iqembu le Highlanders njalo ensukwini ezisanda kwedlula uGumede uthe livele liyake libhekane lakho okufana lalokhu yikho kwaze kwaqala ingoma ethi “Kayisoze ibulawe”.

PHILLIP CHIYANGWA

Loba nje kungela kuhlaliseka emdlalweni wenguqu kwele Zimbabwe, umkhokheli wenhlanganiso ye Zifa uPhilip Chiyangwa nguye okhethwe ukuba akhokhele inhlanganiso yeCosafa kukhetho oluqhutshwe ensukwini ezisanda kwedlula.

Kusigaba se PSL iqembu le CAPS United yilo eliphakamise isicoco seligi lonyaka kuthi iqembu elingene lonyaka ele Ngezi Platinum liphakamise inkezo enkulu elizweni eye Chibuku Super Cup.

Lokhu kutsho ukuba womabili lawa maqembu yiwo azamela ilizwe emncintiswaneni eyokudinga intshantshu zezwekazi lase Africa ngomnyaka ka 2017.

Ilizwe le Zimbabwe lonyaka lithumele iqembu elilabantu abangamatshumi amahlanu lantathu abagoqela abadlali, abaqeqetshi kanye leziphathamandla kumidlalo ye Olympics eqhutshelwe kwele Brazil kodwa akula ngitsho loyedwa umdlali owenelise ukuthola imendulo.

KIRSTY COVENTRY

Umbhukutshi olodumo emhlabeni jikelele uKirsty Coventry uthethe umhlala phansi ngemva kwalimidlalo eseleminyaka engamatshumi amathathu lambili eyokuzalwa.

Abadlali beqembu le Mighty Warriors bathe bephenduka ekhaya ngemva kwemidlalo yeOlympics badane kakhulu lapho bephiwa imali zokugada bebuyela ezindlini kuphela bona kade bekhangelele ukubongwa yinhlanganiso yeZifa lohulumende.

Amanye njalo amaqembu abesifazane aqhube kuhle ngomnyaka ka 2016 ngabalisa elamantombazana aleminyaka engamatshumi amabili lanye amela ilizwe emdlalweni we hockey kanye lamela ilizwe emdlalweni we netball.

HOCKEY

Iqembu le hockey lifinyelele ukuyadlala kumidlalo yezizwe zomhlaba eqhutshelwe elizweni le Chile ngenyanga kaLwezi ikanti ele netball lizakuyamela ilizwe lezwekazi lase Africa kumidlalo ezaqhutshelwa kwele Botswana ngomnyaka ozayo.

Iqembu labesifazane elimela ilizwe emdlalweni kakhilikithi lona lizaphatheka kumidlalo yezizwe zomhlaba ezaqhutshelwa ezihlengeni zase West Indies ngenyanga ka Nhlolanja ngomnyaka ozayo.

Ingqungquthela yomdlalo wenqindi uCharles Manyuchi uqhubekele phambili ephakamisa ilizwe leZimbabwe njengoba eyenelise ukuvikela isicoco sakhe ese World Boxing Council kusigaba se Welterweight.

XS
SM
MD
LG