WASHINGTON DC —
Amagqwetha ammela umdlali wezokugijima, uOscar Pistorius, ogijima ngenyawo zokubazela ngoLwesibili bagqibe ukupha ubufakazi, umahluli, uNkosikazi Thokozile Masipa wathi luzaqhubeka ngenyanga ezayo lapho okuzagqitshwa khona loludaba.
Abammela uPistorius bathi abafakazi abanengi ababethembise ukufakaza bephathisa umamangalelwa baphinda bala ukwenza lokhu ngezizatho ezitshiyeneyo.
UPistorius wetheswa icala lokudubula intombi yakhe, uReeva Steenkemp nyakenye esithi wayemcabangela ukuthi lisela elingene esambuzini lazivalela. Kodwa umthethwandaba uthi kwaba lokungezwani uReeva wangena esambuzini lapho uPistorius adubula inhlamvu ezinhlanu wambulala. UPistorius uyalilandula lelicala.