Izisebenzi zamabhanga ezikumanyano wenhlanganiso zabakulumsebenzi owe Zimbabwe Bankers and Allied Workers’ Union (ZIBAWU) ngoLwesine zitshengisele zisola ukuxotshwa kwesisebenzi se Stanbic Bank, uNkosazana Verity Mutsamwira, obikwa exotshelwe ukumela ilungelo lezisebenzi zalelibhanga.
Bebesidla ubhedu, behlabela betshaya ingungu njalo begida ngokukhonona okukhulu abesifazana, abesilisa labontanga edolobheni leHarare betshengisela ngokwenza kwebhanga leStanbic abalisole ngokuphathwa kubi kwabesifazana emsebenzini.
Lokhu kuza ngemva kokuba uNkosazana Mutsamwira ubikwa waxotshelwa ukukhankasela amalungelo ezisebenzi engumgcinisihlalo wezisesebenzi zeStanbic Bank ephinda njalo abe ngumsekeli kamgcinisihlalo wezisebenzi zonke zamabhanga kunhlanganiso yeZIBAWU.
Ekhuluma ngaloludaba, omela abesifazana enhlanganisweni yeZIBAWU, uNkosikazi Benis Maluleki, uthe okwenze batshengisele yikuthi bafuna abesifazana baphiwe amathuba alinganayo labesilisa emsebenzini.
UMnumzana Paul Mutsatsa, umqondisi wokuqoqwa kwenhlelo zeZIBAWU, uthe njengenhlanganiso bazazama ngendlela zonke ukuthi udaba lokuMutsamwira lube yisifundo kumankampani wonke ukuthi abesifazana kumele babe zinkokheli.
Umsekeli womkhokheli weZIBAWU, uMnumzana Afregnate Goto, uthi loba nje eleZimbabwe lilemithetho enikeza abesifazana amathuba alingane lawabesilisa kuyadanisa ukuthi amabhanga anjenge Stanbic ayehluleka ukulandela imithetho.
Ekhuluma ngokufanayo, omelet iMufakose edale lephalamende, uNkosikazi Paurina Mpariwa webandla eliphikisayo ele MDC-T omanyene lezisebenzi lezi ekutshengiseleni, uthe bona njengabanye babasebenza ekubunjweni kwesisekelo sombuso welizwe esitsha kabasoze begoqe izandla abesifazana behlukunyenza emsebenzini.
Imizamo yokukhulumisana leziphathamandla zebhanga leStanbic ayifezekanga ngoba incingo loba omakhalekhukhwini bekungaphendulwa.
Lobanje imibiko ekhutshwe luhlangothi lukahulumende olwe Zimbabwe National Statistics Agency (Zimstats) ngenyanga edluleyo iveza ukuba ilizwe lilabesifazana abanengi abaqhatshiweyo ukwedlula abesilisa, kusadingakala ukuthi amathuba abo alinganiswe emisebenzini.
Okungamalise abanengi yikuthi abantu abatshengisele ngoLwesine kabazange bathintwe ngamapholisa wona avame ukuhlukuluza abantu abamela amalungelo abo.