amalinks wokungena

Breaking News

Ukutshisa Kwelanga Kubaswelisa Imisebenzi eBotswana abeZimbabwe


Ilanga elitshisa okwedlulisa amalawulo emhlubulweni wangezansi kwezwekazi leAfrica ikakhulu kweleBotswana eselikhipha inhlanzi emanzini, selidalele izizalwane zeZimbabwe inhlupho ngoba sezizithola ziswela amathuba emisebenzi emincane yemapulazini ezivame ukuyithola ngalesi sikhathi. Lokhu kungenxa yabalimi asebebeke phansi amakhuba ngoba kungelazulu elinayo.

Ngesikhathi kutshisa ekhaya umumo womnotho ungalethi amathemba kunengi, izizalwane zeZimbabwe zithola isifudumezi seBotswana sesimise amathemba azo.

Inengi eliphila ngemisetshenzanyana emapulazini ngesikhathi sokulima lithi lonyaka lifike emaphethelweni ngoba abalimi abanengi bengazihluphanga ngokulima ngenxa yokuswelakala kwezulu.

Lokhu kutsho ukuthi labo akade bephila ngokuyancedisa emasimini bazithola bengaphandle komsebenzi njalo kumele bekhande amacebo amatsha okuziphilisa.

Abanikazi bamapulazi eBotswana bande ukudinga abazabasebenzela ezitaladeni zeGaborone lapho abeZimbabwe abalinda khona bethembe ukuthola umsebenzi.

Kodwa lonyaka kwehlukile njengoba umnumzana Themba Nkiwane ekhala ngokuthi imsebenzi yemapulazini ayikho njalo lokuthelela ezingandini emadolobheni akusekho.

Omunye wakhe umnumzana Never Ndlovu uthi sebetshona belinde isikhathi eside ukuze bethole abantu abangabaqhatsha, kodwa ngenxa yokoma okubhahileyo, imsebenzi layo iwomile.

Oselesikhathi ephila ngemisetshenzanyana eGaborone umnumzana Mthobi Dube uthi bakhangelele ukuthi kube nzima ngoba ugatsha lozokulima beluyilo oluthatha inengi leZimbabwe elidinga okokuziphilisa.

Umnumzana Sam Mdluli yena ubona udubo kulinani elinengi elivela eZimbabwe elingena lizolwela amathuba amalutshwana atholokalayo.

Abalimi beBotswana bathi isikhathi sesihambile ukuthi bangabalamathemba okuqala ukulima ngesikhathi kukhangelelwe indlala ebhahileyo kuluhlu lwezwekazi elingezansi kweAfrica.

AbeZimbabwe babeka amathemba amanengi kugatsha lokwakha kwanye lokulima ukuthola imisetshezanyana eyaziwa kakhulu ngokuthi ‘ngama piece jobs’ ngakho uma esinye isigaba siqhula kutsho indlala.

XS
SM
MD
LG