amalinks wokungena

Breaking News

UMagagula Ubekwa Emangcwabeni eLady Stanley KoBulawayo


UMnu. Isaaih Magagula obhubhe kunsukwana ezisanda kwedlula ungcwatshwe ngoLwesine.

Obengumqondisi wohlangothi olubona ngokwezindlu kuKhansili yakoBulawayo, uMnu. Isaiah Magagula, ubekiwe ngoLwesine umngcwabeni obuthanise inkulungwane lenkulungwane zabantu emathuneni eLady Stanley Extension Cemetery koBulawayo ngemva kokuphatheka kabuhlungu ngumkhuhlane wemvukuzane.

Izikhulumi emgcwabeni wakhe zonke zichaze uMagagula njengomuntu obelothando kanye lobuntu besithi idolobho lilahlekelwe kakhulu.

UMnu. Cetshwayo Sithole webandla leZAPU uthe uMagagula wahanjiswa libandla leZAPU eNgilandi ukuba ayefunda athi esephenduka ekhaya ezogcwalisa izimiso zebandla azigcwalisa ngempela ngoba uBulawayo wenza ngcono umakuqathanisa lamanye amadolobho.

USenator Matson Hlalo, owake waba nguKhansila koBulawayo, uchaze umuyi njengomuntu obengela bugwelegwele.

Isakhamuzi selokitshi leMzilikazi, uNkosikazi Nomusa Dube, uvumelane loHlalo ethi balahlekelwe njalo uMagagula ebemela abantu engavumi ukuba izindlu zabantu zithathwe okungekho emthethweni.

Abantu abanengi bathe uMnu. Isaaih Magagula wayeyindoda elothando njalo eyazi umsebenzi wayo.
Abantu abanengi bathe uMnu. Isaaih Magagula wayeyindoda elothando njalo eyazi umsebenzi wayo.

UMongameli weMthwakazi Republic Party, UMnu. Mqondisi Moyo, ubike ukuba uMthwakazi ulahlekelwe okumangalisayo.

Esinye njalo isakhamuzi sakoBulawayo, uMnu. Martin Moyo, laye uveze ukulahlekelwa okukhulu esithi kuzabanzima ukuba ikhansili ithole umuntu onjengoMagagula.

UMabhalane wekhansili, uMnu. Sikhangele Zhou, uthe ebesafunda okunengi kumuyi ngoba ebelolwazi olujulileyo ngokusebenza lenguquko ezithile ngedolobho njalo minengi imizi ephume ezandleni zakhe.

Indodana kamuyi, uMnu. Bukhosi Magagula, uchaze uyise njengomuntu olothando obesazisa abantu ethi yebo isizwe silahlekelwe kodwa labo balahlekelwe impela.

Abezombangazwe, osomabhizimusi, izakhamizi zakoBulawayo, abangane lezihlobo, bonke batshengise ukudana okukhulu bethi yebo ubephathekile umuyi kodwa idolobho lilahlekelwe kakhulu.

UMagagula wathwetshulwa yingwe ngomnyaka ka1952, wenza izifundo zakhe ze Ordinary Level eSolusi Secondary School, waqalisa ukusebenzela ikhansili yakoBulawayo kusukela ngo1970.

Umuyi watshiya umsebenzi kukhansili wayasebenzela umsakazo weRhodesian Broadcasting Authority okomnyaka wasuka lapho esesiyaqala izifundo zakhe eBhilithani.

Usebekiwe uIsaaih Magagula Wedolobho LakoBulawayo
please wait

No media source currently available

0:00 0:06:32 0:00
Lapho esitholakala khona

Ekhonale wenza izifundo zaphezulu eze Business Studies, wathola idegree leBachelor of Arts Degree waqhubeka wenza iMaster of Arts Degree in Architecture: Housing Studies eUniversity of Newcastle.

Ngemva kwezifundo zakhe, uMagagula waphenduka njalo ukuzosebenza eBulawayo City Council ngomnyaka ka1981 wahlala ekhansilini phose okweminyaka engamatshumi amane.

UMagagula utshiye umkakhe, uNkosikazi Virginia Magagula, labantwana abayisikhombisa labazukulu abane.

Facebook Forum

XS
SM
MD
LG