amalinks wokungena

Breaking News

UMalema Uthi uMugabe Sokumele Esuke Embusweni


Umkhokheli welinye lamabandla aphikisayo kweleSouth Africa eleEconomic Freedom Fighters (EFF) uMnu. Julius Malema uthi uMongameli Robert Mugabe sokumele asuke embusweni adedele ubukhokheli obutsha.

Ekhuluma eseSoweto ngoLwesine esililweni sowake waba nguMongameli weleCuba uMnu. Fidel Castro, uMalema uthe njengoCastro owatshiyela umfowabo isikhundla, sokuyisikhathi sokuthi uMugabe laye ededele abanye.

“Siyamthanda uMongameli Mugabe,” kutsho uMalema. “Kodwa sesifuna umkhokheli omutsha. NjengoCastro, uMugabe kumele atshiyele abanye intambo zombuso.”

UMnu. Castro wangena embusweni ngemva kokuvukela umbuso owawukhona ngodlame ngomnyaka ka1959 wazosuka esihlalweni ngo2008 esetshiyela umfowabo uMnu Raul Castro.

UMalema ngumuntu owayesaziwa kakhulu ngokusekela umbuso kaMongameli Mugabe esakubandla leAfrican National Congress (ANC).

Kodwa waguqula imbono yakhe ngokuphuma kulelibandla esesungula iEFF, lanxa nje esithi uMugabe ngumuntu alokhu emhlonipha ngokulwela inkululeko yabensundu.

Ingcwethi kwezombusazwe uMnu. Mlamuli Nkomo utshele iStudio 7 ukuthi amazwi kaMalema asekelwa ngabanengi eZimbabwe lemhlabeni jikelele.

“Amazwi kaMalema la kamangalisi ngoba banengi abantu abathi ngempela sokuyisikhathi sokuthi uMugabe esuke embusweni,” kutsho uNMnu. Nkomo.

please wait

No media source currently available

0:00 0:02:04 0:00
Lapho esitholakala khona
XS
SM
MD
LG