Umphathintambo obona ngokuphathelane lesisekelo sombuso njalo engumeli weBuhera West edale lephalamende uMnu Eric Matinenga uthi ukudonselana okukhona kwezombusazwe sokumenze wageza izandla njengoPilatu njalo kasoze ancintise kukhetho oluzayo.
UMatinengi, yena olilunga leMDC ekhokhelwa nguMnu Morgan Tsvangirai uthi eze angene kwezombusazwe wayekhangelele ukusebenza kuhulumende omoya munye oqakathekisa ukuthuthukisa impilo kazulu.
Kodwa uthi lokhu ayisikho akutholileyo ngoba kuhlezi kulokudonselana kuhulumende njalo ukuzimisela ukusebenzela uzulu kusilela kunengi labanye bakhe kwezombusazwe.
Ekhuluma leStudio 7 ngoLwesibili uMnu Matinenga uthe okunye okwenze wathatha isinqumo sokubana engancintisi kukhetho oluzayo yikuba ukholelwa ikakhulu kusitsho esithi kusinwa kudedelwana.
