Abenhlanganiso ezizimeleyo ezedlula amatshumi ayisikhombisa, babuthane eHarare namhlanje, embukisweni wokwethulela uzulu ulwazi ngemisebenzi abayenzayo, owe 2019 NGO Expo, oqoqwe ngabomanyano owe National Association of Non Governmental Organisations-NANGO.
Lumbukiso wamalanga amathathu oqale ngoLwesine, ubuthanise abenhlanganiso ezehlukeneyo kunhlangothi zonke zempilo ngenhloso yokubukisa imisebenzi yabo ukuze icace kumuntu wonke lakuhulumende.
Isiphathamandla se Nango uNkosazana Nokuthula Matshazi Mhluzana uthi bona njengenhlanganiso bakhuthaza ukusebenzelana okuhle phakathi kwabo lohulumende.
“Sikhuthaza ukubambana ukwenzela intuthuko eye lizwe lonke, sikhuthaza ukuthi uhulumende abambane lama ngos kusetshenjelwana kuhle ngoba sithuthukisa umphakathi munye , sikhuthaza njalo ama ngos ukuthi lawo abe open ukusebenzelana lo hulumende babe ngabantu abayabe belungele ukuncedisa lapha uhuumende ayabe esilela khona”
Unkosikazi Lindani Maphosa usebenzela inhlanganiso ye Hand In Hand Zimbabwe eseziqintini eziyisikhombisa, agoqela I Lupane, Gwanda, Bulilima lezinye.
“E Bulilima siku ma wards angu 10. Sile Ntshangwa, sile Nkulungwe, Sile Dombodema , I Vulindlela , I Malwanswazi,I Khame le Plumtree town.Siya trainer Omama ukuthi babumbe amabhizimusi amancane ukuthi baziphilise.Basungula ama group ale 5 kusiya ku 15 sibafundisa ukuthi basebenze kanjani bebolekisana imali.”
Abakade bekulumbukiso bebelibaziswa ngamaqembu omculo atshiyeneyo.
Osakhulayo uNontetho Ncube ubebukisa ulwazi losizo abalalo olungaphathisa kwezemitshina yangalezi nsuku eye Information Technology ICT phansi kwenkampani eye IT Solutions Kanye lokulondolozwa kolwazi ngeziphala ezifana laboCloud.
“I cloud computing siyabe sikhuluma ngokuthi I bhizimusi yethu kayingapheleli kuphela ema phepheni, kayingapheleli kuphela ema fonini , ayibekhona ku internet ngoba ingahlala okokuthi umuntu angakwanisa ukuyi access anytime.”
U Nkosazana Progress Sibanda wenhlanganiso yeYouth Empowerment and Transformation Trust uthi balezifundo zabatsha zokubalolonga ukuba zinkokheli ezikhaliphileyo abazaphathisa kuntuthuko yelizwe.
“Njengama youth elizweni lonke asisebenzeni sonke ngoba yithi elakusasa lakhona .Actually now sesisithi I kusasa lakhona kuleli yithi.”
Lumbukiso ungenwe ngabenhlanganiso zenhlangothi ezitshiyeneyo zempilo okugoqela lemisakazo yezigaba eyamaCommunity Radio Stations lezabantu abakhubazekileyo bebukisa imisebenzi yabo yezandla. Bekulemihlangano ebisenziwa eceleni kwalumbukiso, egoqela owenziwe namhlanje wabatsha becebisana ngokuzithuthukisa oweYouth Conversation phansi kwendikimba ethi #LeaveNoYouthBehind le #TogetherWeSpeak.