amalinks wokungena

Breaking News

Umculi Wezokholo Upheka Idlalade Elithoba Amanxeba


UBambiza Tholakele
UBambiza Tholakele

Kuwoza Friday siqhunse ezintsha eziphuma kudlalade elitshisa lomculi weZimbabwe wezokholo kweleSouth Africa UTholakele othi 'Ungithobe amanxeba'.

Idlalade lika Bambiza Tholakele, abanye abambiza ngokuthi nguQueen in Gospel, elitsha leli likuveza obala ukuthi kungani besithi uyindlovukazi kwezamahubo okholo.

Ziphekwe zavuthwa busu zonke zolitshumi lambili, kwazise ziphothulwe ngemidumo yonke ongayicabanga.

Ikhonale ethiwa ‘Bakhuluma ngoJesu’ ebaselwe ngeziginci zeKwasakwasa. Yenake uThokakele uthi lelidlalade elingelesine, ulipheke amaphaphu ehleli phansi waliphakulula sekusobala ukuthi selivuthwe busu.

“Indlela amaculo ami engiwabeke ngakhona ayabonisa ukuthi sengikhulile. Agoqela wonke umuntu njalo angigijimisanga ukukholisa kuphela. Ayaxwayisa, ayakha njalo ayaduduza.”

Lintombi endala ethethwe koNdlovu, sekuleminyaka eyisithupha icabange ukuzimela yodwa, yethula amadlalade abalisa ‘Umkhuleko wami kubaba’, ‘Ngivulele Nkosi’, ‘Jehova Nkosi yami’ laleli elitsha elithi ‘Ngithobela amanxeba’.

Umculi wezokholo lwesiChristu
Umculi wezokholo lwesiChristu

Lindlovukazi kwezokholo ithi ikusasa layo kwezomculo lizovinjwa yisibhakabhaka kodwa uyakufithizela ukuthi ubude kabuphangwa.

“Njengoba ngiqalise uku recorder idlalade lami ngo 2010. Ngingomunye ngifanele ukuthi ngabe sengiledlalade le si 10. Kodwake ngibonile ukuthi kumele ngihambe kancane kancane ngilokhe ngifunda ukwenzela ukuthi into yami yonke engiyenzayo ibe yinto ebukekayo.”

Ukwenelisa komculi ukuxubanisa imidumo etshiyeneyo kuokhombisa ukukhula emculweni. Le yona ethi ‘Ngawe sizonqoba’ usungathi uyizwa uthi ihwatshwe yintshantshu kaMaskandi.

Okwamanje uTholakele emanyene lamankampani agoqela Ekhaya Neighbourhood Security leye Usizo Promotions uqoqa inkalakatha yegigi labaculi bezokholo elizaqhutshelwa eHilbrow Theatre mhlaka 25 linyanga.

Uthike leli lidili lamadili lapho abaculi abazaceca sengathi umhlaba ucinile, labo bake bezwe okuzwiwa ngabaculi abafana labo Beyoncé mabesiya emkhosini yokuyathola imivuzo.

“Lo umcimbi esizaba lawo mhlaka 25 November, kulapho esithi hayi abaculi bakithi akesiziqhenyenini ngomsebenzi wethu, sivunule ngendlela esifuna ngakhona, sijabulise abantu.”

Okwamanjeke uthi nxa ufuna izixwayiso, induduzo lokukhuthazeka emoyeni lakwezokholo zitholele leli elakhe elisatshisayo elithi ngithobe amanxeba ubusiseke.

XS
SM
MD
LG