amalinks wokungena

Breaking News

Umdeni Labangane Sebengibalekela, Kutsho uMugabe


UMnu Robert Mugabe uthi selokhe egenqulwe ngamasotsha embusweni, izihlobo zakhe kanye labangane kabasabonakali.

UMugabe uveze lokhu ekuhlanganeni kwakhe lomkhokhela webandla leNatioanl People’s Party (NPP) uNkosikazi Joice Mujuru ngoLwesibili.

UMujuru utshele iStudio 7 ukuthi wethekelela uMugabe endlini yakhe eHarare ngemva kokuba emtshayele ucingo ecele ukuthi azembona.

Kulapho ke uMugabe afika wamtshela khona ukuthi izihlobo sezimbalekela kanti labangane bakhe labo kabasabonakali.

Ebuzwa ukuthi impilakahle kaMugabe injani, uNkosikazi Mujuru uthe ukhanya eziphilele kuhle. "Ngijabulile kakhulu ngendlela abeyiyo yona. Uziphilele sibili," kutsho uMujuru.

Kodwa uthe uMugabe ukhanya ebuhlungu ngokukhitshwa kwakhe embusweni.

UMugabe uxotshe uMujuru kuZanu PF lasesikhundleni sokuba ngumsekeli wakhe ngomnyaka ka2014 emethesa icala lokuzama ukumbulala ngoba efuna isikhundla sakhe.

Kodwa uMujuru uthi uMugabe ubekhanya esezisola kakhulu ngalokhu lanxa nje engazange ephumele egcekeni etsho ukuthi uyaxolisa.

Uthe njalo wathola uNkosikazi Grace Mugabe engekho kodwa wakhuluma laye ecingweni.

Facebook Forum

XS
SM
MD
LG